VMA 40 ára – „Finnum fyrir mikilli velvild“

Verkmenntaskólinn á Akureyri fagnar 40 ára afmæli sínu á morgun. Bæjarbúum, fyrrum nemendum og öðrum velunnurum skólans er boðið í heimsókn til að gleðjast yfir áfanganum.

„Það verður afmælishátið hér milli kl. 15 og 17, opið hús og allir velkomnir. Það verður hægt að ganga um skólann og inn á brautunum verður ýmislegt að gerast sem gestir geta skoðað. Þá ætlum við að vera með sýningu á gömlum skólablöðum og tína saman myndir og myndefni úr sögu skólan. Síðan verða nokkur ávörp, tónlistaratriði og auðvitað afmæliskaka,“ segir Sigríður Huld Jónsdóttir, skólameistari Verkmenntaskólans á Akureyri. Á föstudag verður svo móttaka fyrir núverandi og fyrrverandi starfsmenn skólans í tilefni afmælisins.

Margt gerst á 40 árum

Verkmenntaskólinn á Akureyri hefur sannarlega mikið breyst á þeim 40 árum sem hann hefur verið starfræktur. Hann varð til úr mörgum menntaeiningum sem sameinaðar voru undir hans merki árið 1984 og síðan þá hefur skólinn vaxið og dafnað. Í dag er afar fjölbreytt nám í boði í skólanum, bæði bóklegt og verklegt. Þá er þar boðið upp á bæði dagskóla og kvöldnám, sem og nám fyrir þá sem ekki hafa lokið viðmiðum grunnskóla eða eru með sértækar þarfir. Um 1000 nemendur eru í skólanum í vetur ásamt um 300 nemendum í fjarnámi, en stór hluti fjarnema eru í iðnmeistaranámi.

• Sjá fyrri umfjöllun Akureyri. net  Fleiri nýnemar en áður í 40 ára sögu VMA

„Það eru mörg fyrirtæki sem væru sjálfsagt hreinlega ekki til á Akureyri ef við hefðum ekki þennan skóla hérna.

Fólk þakklátt fyrir VMA

„Markmiðið með svona afmælishátið er fyrst og fremst að efla tengsl og búa til ný við þá sem við eigum í samstarfi við í okkar nánasta umhverfi. Við finnum alltaf fyrir mikilli velvild í garð skólans, bæði frá fólki sem hefur átt hér börn eða verið nemendur hérna, sem og frá fyrirtækjum hér á svæðinu. Fólk er gríðarlega þakklátt fyrir þennan skóla,“ segir Sigríður og heldur áfram; „Það eru mörg fyrirtæki sem væru sjálfsagt hreinlega ekki til á Akureyri ef við hefðum ekki þennan skóla hérna. Eins er tilvist skólans ákveðin leið fyrir Háskólann á Akureyri að fá nemendur til sín, því það skiptir máli fyrir Háskólann að það séu öflugir framhaldsskólar hér á Akureyri. Þetta styður allt hvert við annað,“ segir Sigríður og býður alla áhugasama velkomna að líta við á afmælishátíðinni á morgun. Dagskrá afmælishátíðarinnar má sjá í heild sinni HÉR

• Lengra viðtal við Sigríði Huld, skólameistara VMA, verður birt á Akureyri.net á næstu dögum þar sem Sigríður lítur um öxl en hún hefur verið í stjórnendastöðu við skólann í 19 ár.