Mjólk og ávextir ekki hluti af fríum máltíðum

Ávaxta- og mjólkuráskrift í grunnskólum Akureyrarbæjar verða ekki hluti af fríum skólamáltíðum, samkvæmt ákvörðun bæjarráðs frá því í morgun um lækkanir á gjaldskrám. Spurt var fyrir nokkrum dögum hvort fríar skólamáltíðir tækju aðeins til hádegisverðar eða allra máltíða í skólanum og þá meðal annars vísað til ávaxta- og mjólkuráskrifta. Svarið liggur fyrir.

Annaráskrift fyrir máltíðir lækkar um 100% – verður sem sagt ókeypis – en ávaxta- og mjólkuráskriftir lækkar um 5%.  Ávaxtaáskrift mun kosta 2.089 krónur og mjólkuráskriftin 923 krónur á mánuði frá 1. september. Hvort tveggja hækkaði um 9% frá áramótum og mun lækka um 5% frá 1. september. Sama á við um frístund í skólanum, skólamáltíðir í lengri viðveru og síðdegishressing lækka um 5% samkvæmt þessari ákvörðun og eru því ekki skilgreindar sem hluti af fríum skólamáltíðum. Lækkanir á hinum ýmsu liðum eru 1-5 prósent, í flestum tilvikum fimm prósent. 

Grunnskólar bæjarins voru settir í dag og hefst kennsla á morgun samkvæmt stundaskrám.

Lækkanir taka gildi 1. september

Bæjarráð samþykkti í morgun breytingar á gjaldskrá Akureyrarbæjar með gildistíma frá og með 1. september. Bæjarráð fjallaði um gjaldskráamálið á fundi sínum fyrir viku að áeggjan bæjarfulltrúanna Hildu Jönu Gísladóttur (S) og Sunnu Hlínar Jóhannesdóttur (B), meðal annars eftir að þær birtu grein á Akureyri.net með áskorun til bæjaryfirvalda. 

• Endurskoða gjaldskrár fyrir 1. september | akureyri.net
• Segja gjaldskrár hafa verið í endurskoðun | akureyri.net
• Skólamáltíðir: gjaldtaka um 40% af kostnaði | akureyri.net