Hart barist í sigri Þórs á Snæfelli

Þór vann Snæfell í 17. umferð 1. deildar karla í körfuknattleik í kvöld, 93-87, eftir mikinn barning og átök, sérstaklega í seinni hálfleiknum. Þórsarar eru því áfram í 5. sæti deildarinnar þegar fimm umferðum er ólokið. 

Þórsarar byrjuðu betur og leiddu nánast allan fyrri hálfleikinn, náðu mest 17 stiga forskoti rétt eftir miðjan annan leikhluta, en Snæfell minnkaði muninn niður í níu stig áður en fyrri hálfleik lauk. Þeir héldu svo áhlaupinu áfram, jöfnuðu og komust yfir um og eftir miðjan þriðja leikhluta. Eftir það var leikurinn meira og minna í járnum og mikil átök á köflum, spenna nánast alveg til enda. Þórsarar náðu þó að kveikja neistann að nýju um miðjan fjórða leikhlutann, tóku forystuna og héldu henni út leikinn, en ekki mátti þó miklu muna að gestirnir næðu í skottið á þeim. 

Það er sjaldséð að fjórir leikmenn úr sama liðinu þurfi að hætta leik þar sem þeir eru komnir með fimm villur, en það var engu að síður hlutskipti Hólmara í leiknum, þar af fóru þrír út á síðustu tveimur mínútunum. Ef til vill alveg jafn áhugavert að þrír af þessum fjórum sem náðu sér í fimm villur voru ekki í byrjunarliðinu.