Baldvin stórbætti eigið Íslandsmet í 1500 m

Baldvin Þór Magnússon úr Ungmennafélagi Akureyrar stórbætti eigið Íslandsmet í 1500 metra hlaupi innanhúss í kvöld á Reykjavíkurleikunum í Laugardalshöllinni. Hann sigraði í greininni og varð fyrstur Íslendinga til að hlaupa vegalengdina á innan við 3 mínútum og 40 sekúndum innanhúss; tími Baldvins í kvöld var 3:39,67 mín.

Aðeins er rúm vika síðan Baldvin Þór bætti eigið Íslandsmet í 3000 metra hlaupi innanhúss á móti í Sheffield á Englandi.

Metið sem Baldvin bætti í kvöld setti hann á Reykjavíkurleikunum 4. febrúar á síðasta ári; þá hljóp hann 1500 m á 3:41,05. Eftir hlaupið í kvöld er Íslandsmet Baldvins innanhúss betra en met hans utanhúss. Það setti hann í júlí á síðasta ári: 3:39,90 mín.

Baldvin á níu Íslandsmet

Baldvin Þór á Íslandsmet í fimm greinum utanhúss:

• 1500 m – 3:39,90 mín – sett í júlí 2024
• 3000 m – 7:49,68 mín – sett í júlí 2023
• 5000 m – 13:20,34 mín – sett í apríl 2024
• 5 km götuhlaup – 13:42,00 mín – sett í mars 2024
• 10 km götuhlaup – 28:51,00 mín – sett í október 2023

Hann á fjögur Íslandsmet innanhúss:

• 1500 m – 3:39,67 – 27. janúar 2025
• 1 míla – 3:59,60 – 14. janúar 2023
• 3000 m – 7:45,13 – 19. janúar 2025
• 5000 m – 13:58,24 – 24. febrúar 2023