Smári Jónsson – lífshlaupið

Smári Jónsson var fæddur 9. ágúst 1948 í Innbænum á Akureyri. Hann lést á heimili sínu í faðmi fjölskyldunnar þann 17. apríl s.l. eftir erfiða baráttu við krappamein.

Móðir Smára var Aðalheiður Jónsdóttir verkakona f. 12. 12. 1919 d. 14. 05. 2005 og faðir hans var Sigþór Höskuldur Ingimarsson f. 13. 06. 1925 – 17. 06. 1948.

Eftirlifandi eiginkona Smára er Þórdís Bjarnadóttir f. 18. 05. 1953. Dætur Smára og Þórdísar eru:

Heiðdís f. 14. 05. 1972 en eiginmaður hennar er Arnar Freyr Jónsson. Heiðdís á tvö börn frá fyrra sambandi, Smára Jónsson f. 15. 15. 2001 og Hildi Þóru Jónsdóttur f. 05. 09. 2003.

Brynhildur f. 26. 11. 1974, hún er gift Sveini Torfa Pálssyni og eiga þau tvö börn, Kristínu f. 14. 07. 2001 og Viktor Smára f. 02. 07. 2006.

Viktoría Rut f. 11. 11. 1978 og hún á eina dóttur, Alexu Dís Egilsdóttur f. 11. 03. 2014.

Smári átti fyrir einn son, Rúnar Már. Börn Rúnars eru Tinna Rún f. 23. 11. 1998, Dagur Karl f. 30. 03. 2005 og María Eva f. 24. 06. 2009.

Smári ólst upp í stórum systkynahópi í innbænum á Akureyri en alls eignaðist Aðalheiður 11 börn. Smári var þriðji yngstur þeirra systkina og oft var þröngt í búi í svokölluðu bæjarhúsi í Aðalstræti 23. Í þá daga tíðkaðist að senda börn til sumardvalar í sveit frá unga aldri við misjafnan kost. Það átti einnig við um Smára sem var kornungur sendur í sumarvist á hina og þessa sveitabæi í Eyjafirði. Flestum sumrum eyddi hann þó á bænum Nolli í Grýtubakkarhreppi. Á veturna stundaði Smári nám í Barnaskóla Akureyrar og eins og Innbæingum sæmir var hann mikið á skautum, spilaði íshokkí á pollinum eða ærslaðist í fjörunni. Þáttaskil urðu þegar fjölskyldan flutti úr innbænum í Munkaþverárstræti 5 á Brekkunni en þá var Smári 14 ára og þurfti að fara að vinna fyrir sér. Hann fór því nýfermdur ásamt bróður sínum á síldarvertíð til Raufarhafnar en upp úr því lá leiðin á sjóinn. Smári stundaði sjómennskuna í 16 ár, en þegar dæturnar voru orðnar þrjár var kominn tími á að sigla í land. Þrítugur hóf hann því nám í húsamálun við Iðnskólann á Akureyri og hefur æ síðan verið betur þekktur sem Smári málari en sjóarinn síkáti. Alltaf var stutt í húmorinn hjá Smára og fáir sneggri að svara fyrir sig með snilldar frösum en hann. Sjómennskan togaði alltaf í hann og eignaðist hann síðar bæði trillu og verbúð. Skakið á Svettunni og samfélagið í Bótinni varð í seinni tíð hans annað heimili. Smári átti sér reyndar mörg önnur áhugamál og þar ber helst að nefna laxveiði, skotveiði og golf.

Smári naut sín alltaf best í góðra vina hópi eða í faðmi fjölskyldunnar. Hann var ætíð hrókur alls fagnaðar og tókst alltaf að létta andrúmsloftið með glaðbeittum húmor hvar sem hann fór. Við minnumst hans með ást og þakklæti og erum betri fyrir að hafa þekkt hann.

Smári verður jarðsunginn frá Akureyrarkirkju í dag, þriðjudaginn 30. apríl kl. 13:00.