Sigurður Guðmundsson

Sigurður Guðmundsson, ævintýramaður, athafnamaður, hrekkjalómur, landkönnuður, pólitíkus, verslunarmaður og stríðnispúki er fallinn frá. Hann lést í Lusaka, höfuðborg Sambíu, þann 19. apríl síðastliðinn. Faðir, sonur, bróðir, vinur, og heittelskaður eiginmaður er horfinn inn í draumahöllina.

Siggi fæddist í Kaupmannahöfn rétt eftir miðnætti þann 8. mars árið 1969 og var óhemja frá fæðingu þar sem þurfti að bolta rimlarúmið hans bæði við gólf og vegg á átta stöðum. Annars keyrði hann bara á því út um öll gólf og hélt vöku fyrir gamla fólkinu á neðri hæðinni, varla orðinn ársgamall. Hann var einn af sjö systkinum og að þeim ólöstuðum var Siggi litríkastur þeirra allra. Hann bjó lengst af á Akureyri, sínum ástkæra heimabæ, en endaði ævina í Sambíu aðeins 53 ára að aldri.

Hann var maður sem framkvæmdi allt það sem honum datt í hug, ferðaðist víðar en flest okkar á þessari jörð og sagði ávallt hug sinn allan. Hann var kjarnyrtur og kraftmikill penni og biðu margir eftir ævisögunni á prenti. Við minnumst hans með hlýhug og þökkum fyrir allar sögurnar af honum sem ylja okkur um hjartarætur nú þegar við þurfum að kveðja þennan stórbrotna mann sem snerti hug og hjörtu svo margra.

Siggi fór í Lundarskóla og þaðan í Gagnfræðaskóla Akureyrar og útskrifaðist síðan sem stúdent frá Verkmenntaskólanum á Akureyri. Við tók skóli lífsins þar sem Siggi fór ávallt ótroðnar slóðir.

Hann vann lengi í verslun afa síns, Klæðaverslun Sigurðar Guðmundssonar á Akureyri, sem síðar hét Leikfangamarkaðurinn og var í eigu föður hans – en allir versluðu í Sigga Gúmm þó sumir hafi í seinni tíð viðurkennt að hafa stolið sér eins og einum Action Man-kalli. Síðar stofnaði Siggi sína eigin minjagripaverslun með tvær hendur tómar fyrir utan stóra víkinginn sem var tveir og þrjátíu á hæð og klæddur í stærstu lopapeysu sem hefur verið prjónuð hér norðan heiða. Verslunina kallaði hann The Viking og var með útibú um allt land. Hann sneri sér einnig að bæjarpólitíkinni á Akureyri ásamt því að ferðast, veiða, leita uppi ævintýrin og nýta hvert tækifæri til að hrekkja annað fólk til að fá annað fólk til að hlæja en hæst hló hann þó sjálfur. Siggi var nefnilega alltaf að leika sér og hnötturinn var hans skákborð þar sem skákklukkan tifaði hratt.

Sigurður var búsettur í Sambíu síðustu ár lífs síns og bjó þar ásamt eiginkonu sinni Njavwa Namumba og ungum syni sínum sem fékk nafnið Óðinn Muzima. Í Sambíu ætlaði Siggi að vera með litla ferðaskrifstofu og leyfa fólki að upplifa það sem hann fann þar: dýraríkið, náttúrufegurð og ró sem hann fann hvergi annars staðar. Að vakna rólegur, sofna rólegur og vera laus við allt áreiti var eitthvað sem hann hafði ekki upplifað fyrr en hann kom þangað.

Siggi var áður giftur Jonnu sem honum þótti afskaplega vænt um og eignuðust þau þrjú börn, þau Kolfinnu Frigg, Guðmund Karl og Sjöfn. Fyrir átti Jonna tvö börn, þau Selmu Sigurðardóttur og Sigga Eggertsson. Það má segja að Siggi hafi afrekað ansi margt í lífinu en stoltastur var hann af börnunum sínum.

Siggi upplifði margt á leið sinni um lífið, hann var vinamargur, kom víða við og mátti aldrei aumt sjá. Hann var vinur vina sinna, greiðvikinn og hjálpsamur og dýravinur mikill. Hann var hnyttinn og skemmtilegur, uppátækjasamur með eindæmum, hrókur alls fagnaðar alls staðar þar sem hann kom og hans er minnst með söknuði um víða veröld.

Þrátt fyrir að Siggi hafi kvatt þennan heim svona ungur þá var hann búinn að upplifa svo miklu meira en við hin. Hann hefði allt eins getað verið 150 ára miðað við allt sem hann náði að gera á þessum 53 árum. Ævintýraþráin var mikil og það var alltaf gaman að vera með Sigga. Alltaf mikil læti og lífið tók ávallt einhverja óvænta stefnu því hann gat platað alla með sér út í einhverja vitleysu. En undir lokin fann hann einhverja innri ró og hann var hamingjusamur þegar hann fór.

Siggi lætur eftir sig eiginkonu, fjögur börn og tvö stjúpbörn, ásamt tugum ástvina og hundruðum vina. Minningarathöfn verður haldin í Sambíu fimmtudaginn 28. apríl og verður jarðarförin á Íslandi auglýst síðar.

Blóm og kransar eru vinsamlegast afþakkaðir en þeir sem vilja minnast hans er bent á styrktarreikning, reikningsnúmer: 0565-14-151515, kennitala: 290374-4729, sem hefur verið stofnaður til að standa við bakið á börnum Sigga á þessum erfiðu tímum.

Fjölskylda og ástvinir Sigga þakka hlýhug, stuðning og auðsýnda samúð.