Mögnuð stemning á „Sjally Pally“ í pílu

Alexander Veigar Þorvaldsson og Ingibjörg Magnúsdóttir sigruðu í gærkvöldi á pílukastsmótinu „Sjally Pally“ – Akureyri Open – í troðfullum Sjalla.

Áhugi á pílukasti er orðinn gríðarlegur hér á landi eins og víða um heim og stemningin á þessu fjölmennasta móti landsins var mögnuð. Pílukast er vissulega íþrótt og fólkið í salnum fylgist auðvitað grannt með en er ekki síður mætt á staðinn til að skemmta sér, eins og tíðkast hefur í þessu sögufræga síðustu áratugi.

Alexander Veigar, sem er frá Grindavík, sigraði Þórsarann Matthías Örn Friðriksson í úrslitum og Hafnfirðingurinn Ingibjörg vann Kittu Einarsdóttur frá Keflavík.

Sigurlaunin voru ekki af verri endanum því auk peningaverðlauna hljóta Alexander Veigar og Ingibjörg flug til London, gistingu og miða á heimsmeistaramótið í pílukasti sem fram fer í desember í Alexandra Palace – „Ally Pally“.