Fimmtán ára ferfaldir fimmtarþrautarmeistarar

Fimmtán ára drengir úr röðum Ungmennafélags Akureyrar halda áfram að gera það gott í frjálsum íþróttum. Þeir gerðu sér lítið fyrir og röðuðu sér í fjögur efstu sætin í fimmtarþraut 15 ára drengja á Meistaramóti Íslands í fjölþraut, sem fram fór um liðna helgi. Í fimmtarþraut er keppt í 100 metra grindahlaupi, kringlukasti, spjótkasti, langstökki og 800 metra hlaupi.

 

Mótið er reyndar samsett meistaramót í fjölþraut, 10 km hlaupi og keppni öldunga. Tveir kappar í eldri flokkum komu heim með samtals sjö gullverðlaun. Unnar Vilhjálmsson er þrefaldur Íslandsmeistari í aldursflokki 60-64ra ára og Ágúst Bergur Kárason fjórfaldur Íslandsmeistari með tvö Íslandsmet í flokki 50-54ra ára.

 

 

Tobias Þórarinn Matharel vann fimmþrautina og stefndi á að setja Íslandsmet í 100 metra grindahlaupi og langstökki í flokki 15 ára, en tókst það þó ekki. Hann var einum sentímetra frá Íslandsmetinu í langstökki í þessum aldursflokki. Tobias Þórarinn vann spjókastið, kastaði 39,62 metra, langstökkið, þar sem hann stökk 6,54 metra, og 100 metra grindahlaupið á 14,04 sekúndum. Hann er Íslandsmeistari og setti Íslandsmet í fimmtarþraut drengja.

 

Garðar Atli Gestsson varð annar í fimmtarþrautinni. Hann náði öðru sæti í tveimur greinum, kastaði 38,99 metra í spjótkasti og 33,24 metra í kringlukasti. Kristófer Máni Sigurðsson varð þriðji í fimmtarþrautinni. Hann vann kringlukastið með kasti upp á 38,77 metra og er á mörkunum að komast í unglingalandsliðið í þeirri grein. Hreggviður Örn Hjaltason varð fjórði í fimmtarþrautinni. Hann vann 800 metra hlaupið á 2:27,92 mínútum og varð annar í langstökki með stórbætingu, stökk 5,25 metra.

 

Anna Berglind Pálmadóttir varð í 2. sæti í 10 km hlaupi á braut á tímanum 38:11,95 mínútum.

 

Sjö gullverðlaun í eldri flokkum

Tvær kempur frá UFA sópuðu saman gullverðlaunum, komu heim með samtals sjö slík. Unnar Vilhjálmsson, sem starfar meðal annars sem þjálfari hjá UFA, keppti í aldursflokknum 60-64ra ára og varð Íslandsmeistari í þremur greinum. Hann vann kúluvarpið með kasti upp á 11,16 metra, kringlukastið með kasti upp á 39,10 metra og spjótkastið með kasti upp á 34,42 metra. 

Ágúst Bergur Kárason keppti í aldursflokknum 50-54ra ára og setti Íslandsmet í sínum aldursflokki í 400 metra hlaupi á tímanum 57,05 sekúndur og 300 metra grindahlaupi á tímanum 51,63 sekúndur. Hann vann einnig 100 metra hlaupið á 12,73 sekúndum og 200 metra hlaupið á 26,52 sekúndum.

 

Sannarlega glæsilegur árangur hjá keppendum úr röðum UFA, jafnt þeim yngri og eldri.