Kanadískur markvörður til liðs við SA Víkinga

Íshokkídeild Skautafélags Akureyrar hefur samið við kanadíska markvörðinn Tyler Szturm um að leika með SA Víkingum á komandi tímabili.

Tyler er 26 ára gamall og kemur frá Thunder Bay í Ontario-fylki í Kanada. Hann spilaði síðast með Aquinas College í bandarísku ACHA-háskóladeildinni. Ásamt honum verður Róbert Steingrímsson í markvarðateymi SA Víkinga í vetur. Íshokkídeildin tilkynnti um komu Tylers á Facebook-síðu sinni í kvöld. 

Íslandsmót karla í íshokkí, Hertz-deildin, hófst í kvöld með leik sunnanliðanna, en fyrsti leikur SA er útileikur laugardaginn 14. september.