Mæðgur spiluðu saman með hokkíliði SA

Uppfærð frétt.

Fyrir fáeinum misserum þegar Jónína Margrét Guðbjartsdóttir fagnaði enn einum Íslandsmeistaratitlinum í íshokkí og var spurð hvort hún hygðist halda áfram í íþróttinni svaraði hún því til að hana langaði til að vinna titilinn með dóttur sinni. Jónína er nefnilega engin venjuleg íshokkíkona því hún er fædd 1981, verður 44ra ára í febrúar á næsta ári, og er enn á fullu í hokkíinu með SA. 

Fyrr í haust spilaði dóttir hennar, Freyja Rán Sigurjónsdóttir, sinn fyrsta leik í meistaraflokki og fyrsti leikurinn þeirra saman var 4-1 sigurleikur gegn SR 28. september og svo voru þær aftur saman í leikmannahópi SA í gær þegar kvennalið SA mætti Íslandsmeisturum Fjölnis. Þetta hefur hokkídeildin upplýst á Facebook-síðu sinni og birti þar myndina af mæðgunum. Dóttirin, Freyja Rán, er fædd í nóvember 2009 og verður því 15 ára í næsta mánuði.

Samkeppnin um Íslandsmeistaratitilinn hefur harðnað undanfarin ár og í fyrra voru það stelpurnar í Fjölni sem tóku Íslandsmeistaratitilinn. Ef Jónína á að fá ósk sína uppfyllta um að vinna titilinn með dótturinni þurfa SA-konur að taka á honum stóra sínum í vetur til að tryggja sér sæti í úrslitarimmunni og þá sérstaklega í vor þegar að úrslitarimmunni kemur. Þær urðu nefnilega deildarmeistarar með yfirburðum í fyrra, en sáu á eftir Íslandsmeistaratitlinum suður eftir tap fyrir Fjölni í úrslitarimmunni.