Karlalið KA áfram í undanúrslit bikarsins

Karlalið KA í blaki tryggði sér í gærkvöld sæti í undanúrslitum bikarkeppninnar, Kjörísbikarsins, með sigri á Þrótti Fjarðabyggð. KA vann 3-0, en þurfti virkilega að hafa fyrir sigrinum, sérstaklega í annarri hrinu.

KA vann fyrstu hrinuna nokkuð örugglega, en Þróttarar náðu vopnum sínum í annarri hrinu. Hún endaði í upphækkun eftir að Þróttarar höfðu lengst af haft frumkvæðið í hrinunni. KA náði að kreista fram sigur í lokin, 29-27, og hamraði svo járnið á meðan það var heitt, vann þriðju hrinuna 25-18 og leikinn þar með. 

• KA - Þróttur Fjarðabyggð 3-0 (25-13, 29-27 25-18)
  Tölfræði leiksins
  Upptaka af leiknum

Oscar Fernández var stigahæstur í liði KA með 14 stig og Marcel Pospiech næstur með 13. Hjá gestunum var það Pedro Nascimento sem var stigahæstur með átta stig.

Ásamt KA eru Afturelding, HK og Þróttur R. komin í undanúrslit bikarkeppninnar. 

Nánar má lesa um leikinn á blakfréttavefnum blakfrettir.is.