Áhyggjur af ástandi vega í Grímsey

Grímseyingar kalla eftir endurbótum á vegum í eynni. Fjallað var um vegagerð á íbúafundi á vegum hverfisráðs Grímseyjar fyrr í mánuðinum.

„Vegamál liggja þungt á heimamönnum, það þarf að gera göturnar góðar, ekki bara holufylla þær öðru hverju,“ segir meðal annars í fundargerð íbúafundarins þar sem fjallað var um vegamálin í Grímsey. 

Bundið slitlag var lagt 1994 og aftur 2014, en ekki klárað almennilega þar sem aðeins mátti leggja á ákveðið marga kílómetra, að því er fram kemur í fundargerðinni. Þá hafa Grímseyingar bent á að lestin sem er mjög vinsæl hjá ferðamönnum sé í vandræðum með að keyra á vegum í eynni eins og ástandið er á þeim. Vakin er athygli á að vel virki þar sem sett var „dren“ í fyrravetur og þyrfti að setja það á fleiri stöðum.