Séra Hildur Björk ráðin í Glerárprestakall

Biskup Íslands, séra Guðrún Karls Helgudóttir, hefur staðfest ráðningu Hildar Bjarkar Hörpudóttur sem prests í Glerárprestakalli. Valnefnd hafði valið séra Hildi Björk til starfans og biskup hefur nú staðfest það val. 

Um séra Hildi Björk segir í frétt Þjóðkirkjunnar:

Hildur Björk Hörpudóttir er fædd í Reykjavík árið 1980. Hún lauk mag. theol. prófi frá Háskóla Íslands árið 2015 og lauk MA gráðu í praktískri guðfræði frá sama skóla árið 2017. Hún lauk námi árið 2019 frá Clifford College í „Familiy Ministry.“ Hildur Björk er með kennsluréttindi og meistarapróf í mannauðsstjórnun og er einnig með próf í sáttamiðlun og áfallafræðum. Auk þess hefur hún réttindi sem alþjóðlegur jógakennari.

Hildur Björk hefur marghátta starfsreynslu á sviði félags, kirkju og mannúðarmála. Hún hefur meðal annars verið formaður Jafnréttisnefndar þjóðkirkjunnar, átt sæti í stjórn Félags prestvígðra kvenna, setið í stjórn Skálholtsútgáfunnar og verið aðalmaður í stjórn Verndar, félags um fangahjálp.

Hildur Björk var vígð hinn 7. febrúar árið 2016 til þjónustu í Reykhólaprestakalli og var þar sóknarprestur frá 2016-2019. Hún starfaði sem sviðsstjóri fræðslusviðs Biskupsstofu þar til hún tók við starfi sem sóknarprestur í Reykholtsprestakalli í Borgarfirði í apríl árið 2021. Þar starfaði hún fram á mitt þetta ár.

Hildur Björk á fimm börn.