Pistlar

Betra að gera strax ráð fyrir bílakjallara

Skapti Hallgrímsson skrifar 01. apríl 2025 | kl. 17:30

Ný tillaga Landslags fyrir Nýjan Landspítala ohf., að deiluskipulagi fyrir svæðið.

Skipulagsráð Akureyrar telur skynsamlegt að gera strax ráð fyrir bílakjallara við Sjúkrahúsið á Akureyri í þess að dreifa bílastæðum yfir eins stórt svæði og ný tillaga Nýs Landspítala ohf. gerir ráð fyrir og sjá má á myndinni hér að ofan. Þá efast skipulagsráð um staðsetningu þyrlulendingarsvæðis vegna nálægðar við bílastæði, gangstíg og götu.

Á síðasta fundi skipulagsráðs var lögð fram tillaga Nýs Landspítala að breytingu á deiliskipulagi „svæðis fyrir uppbyggingu heilbrigðisþjónustu við Eyrarlandsveg,“ eins og segir í fundargerð. Um er að ræða breytingu vegna fyrirhugaðrar viðbyggingar við Sjúkrahúsið á Akureyri (SAk).

Útlit viðbyggingar við Sjúkrahúsið á Akureyri sem kynnt var vorið 2024.

Nýr Landspítali birti í maí á síðasta ári niðurstöðu hönnunarútboðs vegna nýs húsnæðis þar sem verða legudeildir fyrir skurð- og lyflækningadeildir, og dag-, göngu- og legudeildir geðdeildar.

Byggingin rís sunnan við núverandi hús SAk eins og sjá má á myndinni hér að ofan. Á því svæði er nú þyrlupallur, upphaflega var ekki gert ráð fyrir slíkum lendingarstað og því mótmælti m.a. stjórn Félags sjúkrahúslækna.

GILDANDI DEILISKIPULAG

TILLAGA AÐ BREYTTU DEILISKIPULAGI

Í tillögu að breyttu deiliskipulagi, sem Landslag vinnur fyrir Nýjan Landspítala ohf., er lóð SAk skipt upp í tvær lóðir en það skiptir almenning í sjálfu sér ekki miklu máli. Fólk yrði varla vart við stórvægilegar breytingar nema breytingarnar á bílastæðunum.

Þó má nefna nokkur atriði sem fram kom í gögnum Landslags:

Norðan bílastæðisins verður göngustígur meðfram Lystigarðinum sem tengist inn á aðkomuleiðir gangandi inn í garðinn en með því er verið að bæta aðgengi gangandi að Lystigarðinum.
Göngustígurinn tengist inn á núverandi gangstéttar meðfram Þórunnarstræti og Eyrarlandsvegi og er hann að hluta innan eystri lóðar SAk.
Aðkoma neyðarbíla er meðfram hliðum núverandi og fyrirhugaðra viðbygginga.
Á lóðinni er núverandi þyrlupallur en í gildandi deiliskipulagi er gert ráð fyrir að þyrlupallurinn flytjist á þak nýbyggingar.
Sú breyting er gerð að nýr lendingarstaður þyrla verður staðsettur á suðvestur hluta svæðisins, austan Þórunnarstrætis og norðan
Búðartraðar.

Til baka í yfirlit pistla