Fara í efni
Pistlar

Wings, Vallass og vínarbrauð

EYRARPÚKINN - 30

Það tók mig langan tíma að læra að reykja þó ég byrjaði snemma og á ég ljúfsárar minningar um ógleði og uppköst tengdar reykingum í laumi.

Við Simmi reyndum fyrir okkur með tóbak í gróðurhúsinu og niðrí hjöllum og var ég ekki gamall þegar þeir Geibbi létu mig skrifa einn pakka af Wings aukreitis hjá Soffíu í Ægisgötunni.

Og Vallass og vínarbrauð var til bragðbætis.

Sátum við í skjóli við rammgert virkið sem lið Palla og Potta hafði rekið saman úr staurum og flekum, mauluðum vínarbrauð og drukkum Vallass með.

Verra var að reykja helvítis Wingsinn!

Ég var bara sjö ára gamall og reyndi að bera mig vel með stóru strákunum og lét mig hafa það að soga í mig einar tvær.

Hvað ungur nemur gamall temur og voru þeir óþreytandi að fá mig til að taka niðrí mig vinirnir en mér þótti nóg um að púa.

Og tókst mér hvorki að halda niðri vínarbrauðum né Vallassi eftir Wingsreykingarnar í hjöllunum.

Ég ældi og var óhuggandi.

Helvítis skræfa ertu Jói! sagði Simmi bróðir. Ertu algjör aumingi? Haltu reyknum niðri maður!

Jóhann Árelíuz er rithöfundur og skáld.

  • Wings, Vallass og vínarbrauð er kafli úr Eyrarpúkanum, gáskafullu skáldverki sem gerist á Eyrinni á Akureyri um miðja síðustu öld. Bókin kom út 2003.

Betrekk

Sigmundur Ernir Rúnarsson skrifar
17. mars 2025 | kl. 11:30

Hús dagsins: Aðalstræti 44; Elínarbaukur

Arnór Bliki Hallmundsson skrifar
16. mars 2025 | kl. 11:45

Um konur og karlrembu

Stefán Þór Sæmundsson skrifar
15. mars 2025 | kl. 06:00

Tilviljanir

Kristín Aðalsteinsdóttir skrifar
14. mars 2025 | kl. 06:00

Auðnutittlingur

Sigurður Arnarson skrifar
12. mars 2025 | kl. 10:00

Linduveðrið

Sigmundur Ernir Rúnarsson skrifar
10. mars 2025 | kl. 11:30