Kári og Skúli

EYRARPÚKINN - 26

Þó Nonni æfði ekki fótbolta Fellssumrin níu tók hann undraverðum framförum í íþróttinni norður kominn enda áhuginn ódrepandi.

Man ég leik í þriðja flokki KA og Þórs á Þórsvellinum sem var malarvöllur neðan við súkkulaðiverksmiðjuna Lindu en fyrir sunnan Kaffibrennslu Kea.

Þar tóku þeir Kári og Skúli Þórsara í kennslustund og skildu eftir með sár enni og ellefu mörk á baki.

Ég stóð á hliðarlínunni og taldi mörkin og voru það Kári eða Skúli, Skúli eða Kári sem skutu undir slár við stengur eða yfirspiluðu markmannsgreyið og hlógu á línunni.

Kunni ég mér ekki læti og hrópaði Áfram KA, afturábak Þór!

Eins og þörf væri á að strá salti í þau sár.

Og Nonni var flinkur á kantinum og sendi á Skúla sem drap 'ann á brjósti og lyfti yfir markvörðinn eða á Kára sem skallaði 'ann inn.

Slíkir voru yfirburðir KA að þeir náðu í markmann sinn meðal drengja að leik á Moldarvellinum og varð Diddi Jakobs fyrir valinu og var útispilari í fjórða flokki.

Fleiri dugnaðardrengir voru í KA-liðinu eins og Frímann Frímannsson og Stebbi Gull en rættist úr fáum þegar þeir fullorðnuðust og létu Þórsurum eftir þau sætin í ÍBA.

Enda vantaði hvorki metnað né hörku í menn eins og Trölla og Manga Jónatans.

Jóhann Árelíuz er rithöfundur og skáld.

• Kári og Skúli er kafli úr Eyrarpúkanum, gáskafullu skáldverki sem gerist á Eyrinni á Akureyri um miðja síðustu öld. Bókin kom út 2003.