Á leið til Bretlands? Ekki gleyma ferðaleyfinu
Opnað verður í dag fyrir umsóknir um rafrænt ferðaleyfi til Bretlands (ETA, Electronic Travel Authorisation) en frá og með 2. apríl þurfa allir Íslendingar, og aðrir erlendir ríkisborgarar sem ekki hafa dvalarleyfi í Bretlandi, leyfi til að ferðast þangað.
Ferðalangar sem hyggjast nýta sér easyJet-flugið frá Akureyri til Bretlands í apríl, eða síðar á árinu, verða því að vera búnir að ná sér í ETA ferðaleyfið áður en haldið er af stað. Skiptir þá engu máli hvort lokaáfangastaðurinn sé Bretland eða hvort aðeins sé um millilendingu að ræða. Rétt er þó að benda á að ef dvelja á lengur en í 6 mánuði í Bretlandi, þarf að sækja um viðeigandi dvalarleyfi, og er þá ekki nóg að hafa ETA. Einstaklingar sem hafa nú þegar dvalarleyfi í Bretlandi þurfa ekki ETA til þess að ferðast til landsins.
Flugvél easyJet á Manchester flugvelli á dögunum. Fjöldi Íslendinga hefur flogið til Englands frá Akureyri síðustu mánuði án sérstakra leyfa en frá næstu mánaðamótum verður engum hleypt inn í Bretland nema viðkomandi hafi keypt rafrænt ETA ferðaleyfi. Mynd: Skapti Hallgrímsson
Gildir í 2 ár
Gott er að sækja tímanlega um ETA-leyfið því umsóknarferlið getur tekið allt að þrjá virka daga. Leyfið kostar 10 sterlingspund – tæpar 1.800 krónur – og gildir í tvö ár frá útgáfudegi eða þar til vegabréf viðkomandi rennur út ef það er innan þessara tveggja ára. Leyfið tengist vegabréfi umsækjanda sjálfkrafa og meðan leyfið er í gildi getur viðkomandi ferðast eins oft og hann vill til Bretlands.
Sótt er um ETA-leyfið annaðhvort með „UK ETA app“smáforritinu, fyrir iPhone og Android-síma, en einnig er hægt að sækja um á vefsíðu breskra stjórnvalda, GOV.UK.
