Hátíð í Höllinni – Þór beint upp í efstu deild?

Handboltalið Þórs tekur í dag á móti ungmennaliði HK (HK2) í lokaumferð Grill 66 deildarinnar, næst efstu deildar Íslandsmótsins. Þórsarar eru á toppnum og nægir jafntefli til þess að tryggja sér sigur í deildinni og þar með sæti í efstu deild á ný eftir fjögurra ára fjarveru.

Leikurinn hefst kl. 16.15 í Íþróttahöllinni á Akureyri og vonast Þórsarar eftir að stuðningsmenn liðsins fjölmenni og stemningin verði ámóta og þegar Þór og Fjölnir háðu eftirminnilegt úrslitaeinvígi um sigur í deildinni fyrir ári síðan. Þá töpuðu Þórsarar naumlega með eins marks mun í oddaleik en eru í mjög vænlegri stöðu að þessu sinni. Þeir unnu fyrri leikinn gegn HK2 í vetur með átta marka mun í Kópavogi.

Oddur Gretarsson er einn þeirra Þórsara sem sneru heim á ný fyrir þetta keppnistímabil. Oddur lék í rúman áratug sem atvinnumaður í Þýskalandi en sér nú fram á að fyrsta takmarki verði náð: sæti í efstu deild.

„Kæra Þórsfjölskylda, framundan er síðasti deildarleikur vetrarins. Dæmið er einfalt, með sigri vinnum við deildina og tryggjum okkur sæti í deild þeirra bestu, þar sem við viljum vera,“ segir Oddur í ávarpi til stuðningsamanna á heimasíðu Þórs. „Þess vegna viljum við hvetja alla Þórsara til að taka daginn frá, mæta í höllina, styðja við bakið á okkur og taka þátt í að stíga þetta skref í þeirri vegferð sem við erum í. Sjáumst í Höllinni.“

• Grill 66 deild karla í handknattleik
  Íþróttahöllin á Akureyri kl. 16:15
  Þór - HK 2