Þór/KA í úrslitaleik í dag – Þórsarar í umspili
Þór/KA mætir Íslandsmeisturum Breiðabliks í dag í úrslitaleik Lengjubikarkeppni kvenna í knattspyrnu og í kvöld hefja Þórsarar leik í úrslitakeppni 1. deildar karla í körfubolta þegar þeir heimsækja Fjölnismenn í Dalhús í Grafarvogi.
Sandra María Jessen, fyrirliði Þórs/KA, er mætt til leiks á ný en hún var veik á mánudaginn þegar samherjar hennar lögðu Stjörnuna að velli í undanúrslitunum í Boganum.
Leikur Þórs/KA og Breiðabliks fer fram á heimavelli Íslandsmeistaranna í Kópavogi og hefst klukkan 18.00. Kastað var upp um það í byrjun vikunnar hvort leikið yrði á Akureyri eða fyrir sunnan. Vert er að geta þess að leikurinn verður sýndur á Stöð 2 Sport.
Þór/KA tryggði sér sæti í úrslitaleiknum með sigri á Stjörnunni sem fyrr segir. Jafnt var eftir 90 mínútna leik, 1:1, en Stelpurnar okkar höfðu betur í vítaspyrnukeppni – 4:2.
- Úrslitaleikur A-deildar Lengjubikarkeppni kvenna í knattspyrnu
Kópavogsvöllur kl. 18.00
Breiðablik - Þór/KA
Umspil um laust sæti í efstu deild karla í körfubolta hefst í kvöld. Akurnesingar sigruðu í deildinni og fara beint upp í efstu deild Íslandsmótsins, Bónusdeildina, en liðin í 2.-9. sæti berjast um hitt sætið. Þórsarar enduðu í 6. sæti deildarinnar og mæta liðinu í 5. sætinu, Fjölni. Lengi vel var útlit fyrir að Þórsarar enduðu í 5. sætinu, höfðu setið þar í nokkurn tíma, en Fjölnismenn náðu í lokaleikjunum. Fjölnir hefur því heimavallarréttinn í þessu einvígi, byrjar á heimavelli og fær oddaleikinn á heimavöll, ef til hans kemur.
- Umspil 1. deildar karla í körfuknattleik
Dalhús í Grafarvogi kl. 19:15
Fjölnir - Þór
