Forskot tekið á sumarsæluna

Sumardagurinn fyrsti rennur upp á morgun en segja má að sumri hafi verið þjófstartað: rjómablíða hefur verið í Eyjafirði frá því í byrjun vikunnar.

Einhver kann að halda því fram að mánudagurinn hafi verið hinn óformlegi fyrsti dagur sumars að þessu sinni. Hiti mældist þá 15,1 stig á Torfum í Eyjafirði, náði reyndar ekki 10 gráðum í gær en íbúar fjarðarins fagra kippa sér varla upp við það enda veðrið engu að síður afbragðsgott þegar sólin skín í logninu. 

Enn er boðið upp á blíðu í dag og ekki útlit fyrir að í nótt frjósi milli sumars og vetrar. Samkvæmt þjóðtrúnni boðar frost aðfararnótt sumardagsins fyrsta gott veður um sumarið en ólíklegt er að það skipti Akureyringa máli. Þeir standa alltaf í þeirri trú að veðrið sé gott, það var að minnsta kosti alltaf gott í gær, að því er sumir segja ...

Fyrsti sláttur er jafnan fréttaefni og því var gleðilegt að sjá starfsmenn íþróttafélagsins Þórs við þá iðju á knattspyrnuvelli félagsins í gær. Sumarið hlýtur að vera mætt, þótt ekki sé nema vegna þessa. Veturinn er þó ekki langt undan, eins og sjá á myndinni.