Gerði athugasemdir við skotklukkuna
Staðsetning á skotklukkum við körfurnar í Íþróttahöllinni á Akureyri virðist hafa verið röng frá upphafi þegar körfurnar voru settar upp og teknar í notkun fyrir nokkrum árum, og hefur ekki verið lagfærð þrátt fyrir að þetta hafi verið vitað frá upphafi og bent hafi verið á það.
Eftirlitsmaður Körfuknattleikssambands Íslands á leik Þórs og Vals í átta liða úrslitum Íslandsmótsins, Bónusdeildar kvenna, kom á framfæri athugasemd um þetta við starfsmenn leiksins og setti í skýrslu sína eftir leikinn í gærkvöld.
Bjarki Ásbjarnarson á ritaraborði leiksins sýnir tveimur af dómurum leiksins, þeim Kristni Óskarssyni og Stefáni Kristinssyni atvik sem þeir þurftu að skoða til að geta ákveðið hvort liðið átti boltann. Þetta atvik er ekki það sem vísað er til í fréttinni varðandi það hvort skotklukka hafði runnið út eða ekki. Mynd: Skapti Hallgrímsson.
Málið snýst um það að skotklukkurnar eru fyrir innan járnavirkið sem heldur körfunum og körfuspjöldunum uppi og skyggja skástífur úr járni þannig á skotklukkuna á ákveðnum stöðum á vellinum. Sömuleiðis háir þetta kvikmyndatöku eins og glögglega kom í ljós í leiknum í gær þegar dómarar þurftu að skjótast að skjánum til að skoða upptöku og fullvissa sig um það hvort karfa sem Valur skoraði hafi verið gild eða ekki, þ.e. hvort skotklukkan var runnin út þegar leikmaðurinn sleppti boltanum. Myndavél sem beint er að skotklukkunni er þannig staðsett að járnstöng skyggir á hluta hennar og getur því truflað við slíka ákvarðanatöku dómara eins og í leiknum í gær.
Stefán Smári og Bjarki á ritaraborðinu rýna á skjáinn ásamt dómurunum Kristni Óskarssyni og Stefáni Kristinssyni. Mynd: Skapti Hallgrímsson.
Hér má sjá staðsetningu skotklukkunnar ofan við körfuna, innan við skástífur úr járni sem eru hluti af rammavirkinu sem heldur körfunni uppi. Á vissum stöðum á vellinum skyggja þessar járnstangir á skotklukkuna, meðal annars frá sjónarhorni myndatökuvélar sem beint er að skotklukkunni. Mynd: Skapti Hallgrímsson.
