Sex frá SA á HM með íshokkílandsliðinu

Skautafélag Akureyrar á sex leikmenn í A-landsliði kvenna í íshokkí sem heldur utan til Riga í Lettlandi í byrjun apríl þar sem liðið spilar æfingaleik áður en haldið er til Póllands þar sem liðið tekur þátt í A-riðli 2. deildar Heimsmeistaramótsins.

 

Jón Benedikt Gíslason, þjálfari landsliðsins, kemur einnig úr röðum SA og kæmi ekki á óvart þó fleiri Akureyringar væru í starfsliðinu í kringum hópinn, en sjá má lista yfir alla leikmenn í frétt á vef ÍHÍ.

 

Leikmenn SA sem eru í landsliðshópnum að þessu sinni eru þær Amanda Bjarnadóttir, Anna Sonja Ágústsdóttir, Eva María Karvelsdóttir, Kolbrún Björnsdóttir, Magdalena Sulova og Silvía Rán Björgvinsdóttir. Að auki eru í landsliðinu fjölmargar sem koma upphaflega úr röðum SA, en spila nú með öðrum félögum, ýmist Reykjavíkurfélögunum eða liðum erlendis. Þetta eru þær Berglind Rós Leifsdóttir, Gunnborg Petra Jóhannsdóttir, Hilma Bóel Bergsdóttir, Katrín Rós Björnsdóttir, Kolbrún María Garðarsdóttir, Ragnhildur Kjartansdóttir, Saga Margrét Sigurðardóttir, Sunna Björgvinsdóttir og Teresa Regína Snorradóttir.

 

Sex lið leika í riðlinum, en ásamt Íslandi eru það Pólland, Mexíkó, Spánn, Tævan og Norður-Kórea. Efsta liðið færist upp um deild, en neðsta liðið fellur niður í B-riðil 2. deildar. Landsliðið spilar æfingaleik í Riga föstudagskvöldið 4. apríl, en fyrsti leikur liðsins í mótinu er mánudaginn 7. apríl.