KA búið að semja við Danann Marcel Römer

Knattspyrnudeild KA hefur samið við danska miðjumanninn Marcel Römer skv. heimildum Akureyri.net. Römer, sem er 33 ára, hefur verið fyrirliði Lyngby Boldklub síðustu ár, en hefur lítið fengið að spreyta sig með aðalliðinu undanfarið og samningur hans rennur út í sumar.

Fótbolti.net greindi frá því í síðustu viku að KA væri í viðræðum við Römer og nú er ljóst að samningur er í höfn. Von er á Römer til Akureyrar í vikunni. Næsta verkefni KA-manna er bikarleikur gegn KFA á fimmtudaginn og næsti leikur í Bestu deildinni er gegn Val í Reykjavík í næstu viku, miðvikudaginn 23. apríl.

Römer leikur alla jafna aftarlega á miðjunni en getur líka leikið í vörn, sem miðvörður. 

KA hefur lokið tveimur leikjum í Bestu deildinni, gerði 2:2 jafntefli við KR á heimavelli í fyrstu umferð en tapaði 4:0 fyrir Víkingi á útivelli í gærkvöldi.