Engan sakaði þegar vinnuvél valt í Gilinu

Betur fór en á horfðist þegar vinnuvél valt af stalli við hlið kirkjutrappanna og niður á götuna, Kaupvangsstræti, laust fyrir hádegi; vélin fór langt út í götuna eins og sjá má á myndinni. Stjórnanda vélarinnar sakaði ekki og mikil mildi er að enginn var á ferli í Gilinu, akandi eða gangandi. 

Vinnuvélin, skotbómulyftari að sögn starfsmanna á vettvangi, var að flytja efni að svæðinu við tröppurnar – eins og gert hefur verið margoft undanfarið. Svo virðist sem jarðvegur hafi gefið sig þannig að hún sporðreistist og valt aftur á bak; „prjónaði“ eins og einn sjónvarvotta orðaði það við blaðamann, og skall niður á götuna.