Kirkjutröppurnar í notkun á sunnudaginn

Langþráð stund rennur upp næsta sunnudag þegar nýju kirkjutröppurnar við Akureyrarkirkju verða teknar í notkun. Margir bæjarbúar – ef til vill flestir – hafa beðið spenntir og óþreyjufullir vegna þess hve verkið hefur dregist en vonandi taka allir gleði sína á ný þegar leyfi fæst til að drepa þarna niður fæti.

Þegar verkið var upphaflega boðið út var miðað við verklok í október á síðasta ári en framkvæmdir töfðust af margvíslegum ástæðum eins og margoft hefur verið fjallað um.

Hátíðleg athöfn hefst klukkan 16.00 á sunnudaginn, 22. desember, neðan við tröppurnar og að henni lokinni verður boðið í skrúðgöngu upp að Akureyrarkirkju, að því er segir á heimasíðu bæjarins.

Þegar Akureyri.net laumaðist upp og niður kirkjutröppurnar í gær voru iðnaðarmenn að koma fyrir grindverki við neðri enda trappanna og múrarar að flísaleggja efsta hlutann.

Man einhver hve margar gömlu kirkjutröppurnar voru? Þær nýju eru jafn margar en margir munu samt örugglega telja þær á sunnudaginn, til öryggis!