Sólríkur flugdagur 1989 og myndir Péturs

SÖFNIN OKKAR – 59

Frá Flugsafninu á Akureyri_ _ _

Akureyri.net heldur áfram að opna dyr safnanna í bænum lesendum til fróðleiks og skemmtunar. Það er gert vikulega, á fimmtudögum.

Í safni Flugsafnsins er að finna skemmtilegar myndir frá flugdögum sem haldnir hafa verið á Akureyri og víðar um landið í gegnum tíðina. Að þessu sinni fáum við að gægjast í myndasafn Péturs P. Johnson sem tekið hefur mikið af ljósmyndum af ýmis konar flugi og flugstarfsemi. Myndir Péturs eru varðveittar á Flugsafninu.

Pétur var ritstjóri tímaritsins Flugs um árabil og er jafnframt einn af hollvinum Flugsafnsins, en Örninn – hollvinafélag Flugsafns Íslands er félagsskapur opinn öllum sem hafa áhuga á varðveislu flugsögunnar, og vilja starfa og styðja við starfsemi safnsins.

Flugdagurinn 1989 var haldinn í blíðskaparveðri þann 22. júlí. Flugmálafélag Íslands og áhugamannafélögin Vélflugfélag Akureyrar, Svifflugfélag Akureyrar, Fallhlífaklúbbur Akureyrar og Flugmódelfélag Akureyrar stóðu fyrir deginum.

Samkvæmt frétt í dagblaðinu Degi bar ýmislegt fyrir augu gesta, sem fjölmenntu á Akureyrarflugvöll, Þar má m.a. nefna Sikorsky „Jolly Green Giant“ björgunarþyrlu Varnarliðsins sem vakti mikla athygli. Á myndum Péturs má sjá að einnig var boðið upp á fallhlífastökk og listflug, og auðvitað var „Þristurinn“ okkar, landgræðsluvélin Páll Sveinsson til sýnis.

Frá því að fyrsti Flugdagur Flugsafns Íslands var haldinn í júní 2000 hefur verið hann verið árviss viðburður. Á deginum er kappkostað að sýna almenningi sem fjölbreyttastar hliðar flugsins, um leið og flugsamfélagið hittist og styrkir tengslin.

Flugdagurinn í ár verður haldinn laugardaginn 21. júní, á sumarsólstöðum og lengsta degi ársins. Sömu helgi fer fram flugkoma (e. fly-in) Vélflugfélags Akureyrar á Melgerðismelum.

Heimildir:

Upplýsingar frá ljósmyndaranum sjálfum og frétt í dagblaðinu Degi 25. júlí 1989, sjá hér: https://timarit.is/page/2688064?iabr=on