Fjármögnun upp á 34 milljarða er lokið

Lokið hefur verið við fjármögnun fyrsta áfanga Eldisgarðs, nýrrar laxeldisstöðvar við Reykjanesvirkjun, með útgáfu nýs hlutafjár og sambankaláni. Það er Samherji fiskeldi ehf., dótturfélag Samherja hf., sem stendur að verkefninu. Fjármögnun fyrsta áfanga nemur um 34 milljörðum króna. Gert er ráð fyrir að eitt hundrað ný störf verði til í stöðinni og álíka fjöldi afleiddra starfa. Þetta kemur fram í frétt á vef Samherja í dag.

Eldisgarður byggir á reynslu Samherja af landeldi í Öxarfirði, en frá árinu 2023 hefur fyrirtækið fjárfest í stöðinni í Öxarfirði fyrir rúmlega fjóra milljarða króna. Þar var um að ræða stækkun og innleiðingu á nýrri tækni sem verður notuð í Eldisgarði.

„Árangurinn af þessum breytingum hefur ekki látið á sér standa og styrkir væntingar okkar um rekstur nýju landeldisstöðvarinnar. Öflugt teymi hefur í langan tíma unnið að undirbúningi þessa stóra og fjárfreka verkefnis og lagt grunninn að uppbyggingu landeldis í fremstu röð á heimsvísu. Ég er afskaplega stoltur af starfsfólki Samherja á þessum tímamótum og við teljum okkur vel í stakk búin að takast á við margfalt stærra landeldi,“ segir Þorsteinn Már Baldvinsson, forstjóri Samherja og stjórnarformaður Samherja fiskeldis.

Stærsti bleikjuframleiðandi í heimi