„Sjally Pally“ festi sig í sessi – MYNDIR

Frábær stemning var í Sjallanum á laugardagskvöldið þegar fram fór útsláttarkeppni stærsta pílumóts í sögu bæjarins – Akureyri Open 2024. Mótið fór nú í fyrsta skipti fram á þessum sögufræga skemmtistað, öllu var tjaldað til og ljóst að Sjally Pally hefur fest sig í sessi strax í fyrstu tilraun!

Dilyan Kolev frá Vopnafirði sigraði í karlaflokki, vann Matthías Örn Friðriksson frá Grindavík í úrslitum, og Brynja Herborg bar sigur úr býtum í kvennaflokki eftir sigur á Ingibjörgu Magnúsdóttur. Brynja er Akureyringur og búsett þar en keppir fyrir Pílukastfélag Reykjavíkur. Þröstur Þór Sigurðsson hreppti Forsetabikarinn; keppni þeirra sem duttu út fljótlega á mótinu. Hann vann Val Guðbjörn Sigurgeirsson í úrslitaeinvíginu. Þá fékk Alexander Veigar viðurkenningu fyrir að ná oftast allra 180 stigum á mótinu.

Akureyri Open hefur til þessa verið haldið í aðstöðu píludeildar Þórs í íþróttahúsinu við Laugargötu en aðsókn var svo mikil að sýnt þótti að finna yrði annan og stærri stað. Sjallinn var það heillinn, og Sjally Pally varð að veruleika. Vísunin er vitaskuld í Ally Pally, Alexander Palace í London þar sem hið geysivinsæla heimsmeistaramót fer fram árlega.

Keppendur voru 160. Mótið hófst á föstudag þar sem pílum var kastað á öllum hæðum hússins og áfram var haldið á laugardagsmorgni. Áhorfendur voru margir en stóri salurinn í Sjallanum var þéttsetinn þegar útsláttarkeppnin fram á stóra sviðinu á laugardagskvöld – 270 manns greiddu aðgangseyri – og fólk skemmti sér konunglega.

Davíð Örn Oddsson, formaður píludeildar Þórs og Halldór Kristinn Harðarson, vert í Sjallanum – sem fór á kostum sem kynnir – voru himinlifandi með hvernig til tókst og sögðu engan vafa á því að mótið með þessu sniði hefði þegar í fyrstu tilraun fest sig í sessi! Ekki yrði aftur snúið.

Enda segir á Facebook síðu píludeildar Þórs: