Tvöfaldur slagur við Hafnfirðinga um helgina

SA Víkingar, karlalið Skautafélags Akureyrar í íshokkí, fær hafnfirska hokkíliðið SFH í heimsókn um helgina. Liðin mætast í Skautahöllinni á Akureyri bæði í dag og á morgun.

Skautafélag Hafnarfjarðar hefur ekki aðstöðu til að spila heimaleiki sína á eigin svelli þannig að fyrri leikur helgarinnar er heimaleikur SFH, en sá seinni er heimaleikur SA. Skautafélag Akureyrar sér um umgjörðina utan vallar í báðum leikjunum.

SA er á toppi Toppdeildar karla í íshokkí með 24 stig úr 11 leikjum, en SFH er neðst á töflunni, situr í 4. sæti með tíu stig úr 12 leikjum. SA og SFH mættust tvisvar undir lok nóvember, þá einnig í bæði skiptin á Akureyri, og úr urðu fjörugir baráttu- og markaleikir. SFH vann fyrri leikinn 7-2, en SA þann seinni 5-2. Hafnarfjarðarliðið sótti nokkuð í sig veðrið á lokavikum liðins árs eftir erfiða byrjun og náði að sigra hin þrjú liðin hvert á fætur öðru á innan við tveimur vikum.

• Toppdeild karla í íshokkí
  Skautahöllin á Akureyri, laugardagur 11. janúar kl. 16:45
  SFH - SA
• Toppdeild karla í íshokkí
  Skautahöllin á Akureyri, sunnudagur 12. janúar kl. 18:45
  SA - SFH