Íþróttir

Tveir blaksigrar og einn í handboltanum

Haraldur Ingólfsson - haraldur@akureyri.net 27.01.2025 kl. 12:30

Julia Bonet Carreras og samherjar hennar í KA eru komnar í fjögurra liða úrslit bikarkeppninnar í blaki. Mynd: Skapti Hallgrímsson

Það var nóg um að vera í boltanum um helgina. Blaklið KA unnu bæði leiki sína um helgina, kvennaliðið búið að tryggja sér sæti í undanúrslitum bikarkeppninnar, og á laugardag styrkti KA/Þór enn stöðu sína á toppi Grill 66 deildar kvenna í handknattleik með sigri.

Föstudagur: KA með sæti í bikarhelginni í blaki

Kvennalið KA í blaki mætti liði Þróttar í átta liða úrslitum bikarkeppni Blaksambands Íslands, Kjörísbikarnum. Þar var sæti í bikarhelginni í boði og létu KA-konur ekki bjóða sér það tvisvar, vilja örugglega endurheimta bikarinn sem þær unnu 2023, en töpuðu honum til Aftureldingar í fyrra. Þær unnu Þróttara næsta örugglega í þremur hrinum og eru því á leið í bikarhelgina í blakinu sem fram fer í Digranesi í Kópavogi 7.-9. mars.

Átta liða úrslit í Kjörísbikar kvenna í blaki
KA - Þróttur 3-0 (25-15, 25-11, 25-16)
Tölfræði leiksins

Laugardagur: KA/Þór styrkir stöðuna á toppnum

KA/Þór hefur verið á toppi næstefstu deildar í handknattleik, Grill 66 deildarinnar, í allan vetur og styrkti liðið stöðu sína á toppnum um helgina með útisigri á Val-2 og hefur nú sex stiga forskot á Aftureldingu og HK. KA/Þór er með 23 stig úr 12 leikjum, hefur unnið 11 leiki og gert eitt jafntefli. Leikurinn á laugardaginn var mögulega sá jafnasti sem liðið hefur spilað í vetur.

Helstu tölur hjá KA/Þór:

Mörk: Susanna Pettersen 7, Anna Þyrí Halldórsdóttir 5, Tinna Valgerður Gísladóttir 5, Bergrós Ásta Guðmundsdóttir 3, Elsa Björg Guðmundsdóttir 2, Kristín A. Jóhannsdóttir 2, Lydía Gunnþórsdóttir 2, Aþena Sif Einvarðsdóttir 1.
Varin skot: Matea Lonac 16 (39%).
Refsimínútur: 4.

Grill 66 deild kvenna í handknattleik
Valur-2 - KA/Þór 25-27
Tölfræði leiksins (hbstatz.is)
Staðan í deildinni

Sunnudagur: KA vann í oddahrinu vestra

Leikur KA gegn Vestra í íþróttamiðstöðinni að Torfnesi á Ísafirði var jafn og spennandi og endaði í oddahrinu. KA vann fyrstu hrinuna, Vestri aðra og KA þá þriðju. Vestri vann fjórðu hrinuna eftir upphækkun og jafnaði í 2-2. KA hafði síðan betur í oddahrinunni.

KA er í 3. sæti deildarinnar með 33 stig úr 15 leikjum og aðeins í humátt á eftir toppliðunum. Þróttur R. er í 2. sætinu með 35 stig úr 16 leikjum og Hamar á toppnum í góðri stöðu með 36 stig úr 14 leikjum.