Samið um jarðvegsvinnu fyrir gervigras Þórs
Akureyrarbær hefur samið við verktakafyrirtækið Nesbræður ehf. um jarðvegsvinnu og frágang við gerð undirlags fyrir gervigras á nýjum æfingavelli á Þórssvæðinu. Verksamningur þess efnis var undirritaður í morgun í Hamri félagsheimili Þórs. Greint er frá þessu á vef Akureyrarbæjar.
Strax verður hafist handa, segir á vef bæjarins, og er verkinu skipt í tvo áfanga. „Verkið skal hafið strax við undirskrift samningsins og er því skipt í tvo áfanga. Fyrri hluta skal lokið fyrir 1. nóvember 2024 en hinum síðari 15. apríl 2025.“
Um er að ræða jarðvegsskipti, fergjun og jöfnun á æfingavellinum en einnig er innifalið í verki jarðvegsskipti fyrir ljósamöstrum og stoðvegg við enda vallar. „Fjögur tilboð bárust. Það lægsta var frá Nesbræðrum að upphæð tæplega 110 milljónir króna og hafði umhverfis- og mannvirkjaráð áður samþykkt að ganga til samninga við Nesbræður vegna verkefnisins,“ segir í frétt á vef Akureyrarbæjar.
