Slökkvilið Akureyrar æfir í Margréti EA

Slökkvilið Akureyrar efndi í morgun til brunaæfingar um borð í Margréti EA 710, skipi Samherja sem liggur við Oddeyrarbryggju á Akureyri. Æfingin fer fram í samvinnu við útgerðina.

Æfingin, sem snýr að brunavörnum og reykköfun, hófst klukkan átta og gert er ráð fyrir að hún standi í tvær til þrjár klukkustundir. Slíkar æfingar eru haldnar reglulega, enda mikilvægt að slökkviliðið sé vel þjálfað í að kljást við mismunandi aðstæður um borð í skipum. Eldvarnarkerfum skipa er ætlað að uppfylla ýtrustu alþjóðlegu kröfur og æfingar haldnar til að ganga úr skugga um að allur búnaður virki sem skyldi.

Meðfylgjandi myndir voru teknar við upphaf æfingarinnar í morgun.