Góð frammistaða en tap í Garðabænum
Kvennalið Þórs í körfuboltanum átti í fullu tré við lið Stjörnunnar þegar liðin mættust í 10. umferð Subway-deildarinnar í Garðabænum í kvöld. Leikurinn var hnífjafn og skiptust liðin á forystunni út allan leikinn. Örlítið vantaði upp á í lokin til að landa sigrinum og fór Stjarnan að lokum með sex stiga sigur af hólmi.
Eftir hnífjafnan fyrri hálfleik þar sem heimastúlkur í Stjörnunni höfðu frumkvæðið lengst af náðu Þórsarar að jafna og komast einu stigi yfir áður en fyrri hálfleiknum lauk. Lore Devos var áberandi í leik Þórsara þar sem Maddie Sutton og Hulda Ósk Bergsteinsdóttir spiluðu ekkert í kvöld vegna meiðsla sem þær urðu fyrir í sigurleiknum gegn Keflavík. Stjarnan hafði frumkvæðið áfram að mestu í seinni hálfleik, en Þórsstelpurnar hleyptu þeim aldrei of langt frá, jöfnuðu og komust yfir bæði í þriðja og fjórða leikhluta.
Stjarnan náði síðan að kreista fram sex stiga sigur á lokasekúndunum eftir hnífjafnar lokamínútur.
- Skorið eftir leikhlutum: 19:17 – 18:21 – (37:38) – 29:24 – 28:26 – 94:88
Lore Devos var í stóru hlutverki í kvöld eins og jafnan áður í Þórsliðinu, skorðai 34 stig og tók 19 fráköst. Heimastúlkurnar Eva Wium Elíasdóttir og Heiða Hlín Björnsdóttir komu næstar í stigaskorinu fyrir Þór.
Tölfræði Þórsara; stig - fráköst - stoðsendingar:
- Lore Devos 34 - 19 - 6
- Eva Wium Elíasdóttir 19 - 2 - 4
- Heiða Hlín Björnsdóttir 14 - 6 - 3
- Hrefna Ottósdóttir 9 - 5 - 1
- Jovanka Ljubetic 5 - 5 - 5
- Karen Lind Helgadóttir 4 - 0 - 0
- Rebekka Hólm Halldórsdóttir 3 - 1 - 0
Smellið hér til að sjá alla tölfræði úr leiknum á vef KKÍ.
Smellið hér til að sjá stöðuna í Subway-deildinni, en þegar þetta er skrifað og birt eru enn í gangi leikir í 10. umferðinni.
