Sigur eða sumarfrí hjá kvennaliði Þórs

Þriðji leikur Þórs og Vals í átta liða úrslitum Íslandsmóts kvenna í körfubolta, Bónusdeildarinnar, verður spilaður í Íþróttahöllinni á Akureyri í kvöld. Eftir tvö töp dugar ekkert annað en sigur fyrir Þórsliðið til að halda lífi í voninni um að komast í undanúrslit. Tapi liðið í kvöld er tímabilinu lokið og sumarfrí fram undan.

• Bónusdeild kvenna í körfuknattleik – átta liða úrslit – leikur 3
  Íþróttahöllin á Akureyri kl. 18:30
  Þór - Valur

Ef Þór vinnur þennan leik verður fjórði leikur liðanna á heimavelli Vals á sunnudag. Þar dugir sömuleiðis ekkert annað en sigur til að halda einvíginu áfram og ef allt gengur upp hjá Þórsliðinu í þessum tveimur leikjum myndu liðin mætast í oddaleik á Akureyri miðvikudaginn 16. apríl.