Íbúar beggja blands gagnvart bíladögum

Íbúar Akureyrarbæjar eru beggja blands gagnvart bíladögum en meirihluti svarenda í könnun bæjarins kvaðst jákvæður gagnvart lokun göngugötunnar eins og hún var í sumar. Þetta kemur fram í könnun sem framkvæmd var á vegum Akureyrarbæjar í samvinnu við Rannsóknastofnun Háskólans á Akureyri. Könnunin var send á 1.000 netföng og bárust svör frá 431 að hluta eða í heild.

Niðurstöður könnunarinnar í heild með greiningum eftir aldurshópum, menntun og búsetu - sjá hér. 

Fram kemur í upplýsingum um könnunina að gögnin séu vigtuð til að endurspegla betur þýðið, þannig að hvert svar frá yngsta hópnum vegur meira en annarra. Svarhlutfall íbúanna var 43%, sem er mun meiri þátttaka en í beinni könnun á viðhorfi rekstraraðila í miðbænum til lokunar göngugötunnar þar sem aðeins 15 af 52 sem fengu könnuna svöruðu henni, eins og fram kom í annarri frétt á Akureyri.net.

Yngsta fólkið neikvæðara gagnvart bíladögum

Viðhorf þeirra íbúa sem svöruðu könnuninni til Bíladaga er beggja blands. Spurt var: Hversu jákvætt eða neikvætt er viðhorf þitt til bíladaga sem haldnir eru í júní ár hvert á Akureyri? 

Álíka margir eru á jákvæðu nótunum og þeim neikvæðu, en flestir þar á milli. Af 417 manns sem svöruðu kváðu 36,5% viðhorf sitt frekar eða mjög jákvætt og sama er að segja á hinn veginn, tæplega 36,3% sögðu viðhorf sitt frekar eða mjög neikvætt.

Svörin voru meðal annars greind eftir aldri, menntun og búsetu. Athygli vekur að hlutfallslega kváðust mun fleiri í póstnúmeri 603 hafa frekar jákvætt eða mjög jákvætt viðhorf til bíladaga en í póstnúmeri 600. Í póstnúmeri 603 voru 44% á jákvæðu nótunum en 31% í póstnúmeri 600.

Þá vekur einnig athygli að yngri svarendur voru frekar á neikvæðu nótunum gagnvart bíladögunum en þeir eldri. Til að mynda kom fram frekar eða mjög neikvætt viðhorf hjá 48% svarenda í aldhurshópnum 34ra ára eða yngri, 21% á aldrinum 35-49 ára, 29% hjá 50-64ra ára og 33% hjá 65 ára og eldri. Almennt séð var viðhorfið neikvæðara hjá fólki með meiri menntun.

Yngra fólkið jákvæðast gagnvart lokun

Þegar kemur að viðhorfi íbúanna til lokunar göngugötunnar vekur orðalag spurningarinnar athygli. Í könnun á viðhorfi rekstraraðila í miðbænum var spurt: Hversu vel eða illa hugnaðist þér fyrirkomulagið í sumar. Í íbúakönnuninni er sett fram jákvæð staðhæfing sem svarendur segjast vera sammála eða ósammála (mjög/frekar/hvorki né).

• Rúmlega þrír af hverjum fjórum svarendum sögðust mjög eða frekar sammála því að þeim líkaði breytingarnar vel.
• Tæpur þriðjungur er frekar eða mjög sammála að loka ætti fyrir umferð vélknúinna ökutækja allan ársins hring.
• Fimmtungur svarenda kvaðst síður sækja sér þjónustu fyrirtækja og stofnana í göngugötunni vegna lokunar.
• Rúm 42% kváðust frekar eða mjög sammála því að lengja tímabil lokunar.
• Tæp 14% kváðust frekar eða mjög sammála því að hafa engar takmarkanir.

Staðhæfing: Lokanir á göngugötunni. Mér líkaði vel þessar breytingar sem gerðar voru í sumar.

Einnig var spurt um viðhorf fólks til þess hvort einhverjar takmarkanir ættu að vera á umferð vélknúinna farartækja um göngugötuna, viðhorf til þess hve langt lokunartímabilið ætti að vera og hvort lokun hafi haft áhrif á það hvort fólk sæki sér þjónustu fyrirtækja og stofnana á svæðinu ef lokað er.

Staðhæfing: Ég vil engar takmarkanir á umferð vélknúinna farartækja í göngugötunni.

Staðhæfing: Ég myndi vilja lengra tímabil lokunar.

Staðhæfing: Ég sæki mér síður þjónustu fyrirtækja og stofnana í göngugötunni ef lokað er fyrir umferð vélknúinna farartækja.

Staðhæfing: Ég vil að göngugatan sé lokuð fyrir umferð vélknúinna farartækja allan ársins hring.