Hreinn Þór bætist við stjórnendateymi Driftar

Hreinn Þór Hauksson hefur hafið störf sem leiðtogi frumkvöðlaverkefna og fjárfestinga hjá Drift^EA á Akureyri.

„Hreinn bætist við stækkandi teymi Driftar^EA og leggur til mikilvæga reynslu úr fjármögnunarumhverfi fyrirtækja eftir margra ára starf á fjármálamörkuðum auk þess sem hann hefur lengi verið þátttakandi í nýsköpunarumhverfinu á Íslandi samhliða öðrum störfum,“ segir í tilkynningu frá Drift. „Hreinn Þór er með meistaragráðu í frumkvöðlafræði og nýsköpun frá Háskólanum í Lundi. Hlutverk Hreins verður að leggja frumkvöðlum lið á fyrstu metrunum og hámarka líkur á að hugmynd verði að veruleika í gegnum þjónustuframboð Driftar.“

Drift^EA – miðstöð frumkvöðla og nýsköpunar – var stofnað árið 2024 með það að markmiði að efla og styðja við frumkvöðlaumhverfi á Akureyri og í Eyjafirði. Drift^EA veitir frumkvöðlum aðstöðu, faglega aðstoð og eftir atvikum fjármagn til að koma hugmyndum sínum í framkvæmd. Fyrstu sex teymin fluttu inn í janúar og hófu starfsemi í febrúar og er það fyrsta skrefið í uppbyggingu öflugs nýsköpunarsamfélags á svæðinu, að því er segir í tilkynningunni.

 

„Ég er einstaklega spenntur fyrir þessu tækifæri til að fá að starfa á vettvangi sem ég brenn fyrir. Metnaðarfull uppbygging Driftar^EA felur í sér fjölmörg skemmtileg verkefni þar sem ég vil leggja mitt af mörkum og ég hlakka til að vinna með frumkvöðlum og fyrirtækjum að því að ná árangri,“ segir Hreinn Þór í tilkynningunni. „Ég vil taka þátt í því að byggja upp umhverfi þar sem góðar hugmyndir verða til meðal öflugra einstaklinga og teyma, byggjast upp og skila á endanum til baka til samfélagsins. Sérstaklega er ánægjulegt er svo að koma að öflugu teymi starfsfólks og aðstandenda Driftar^EA.“