Íslandsmet og ágætur árangur UFA í Gautaborg
Ungmenni úr röðum Ungmennafélags Akureyrar (UFA) stóðu sig með prýði á Gautaborgarleikunum á dögunum, en það er líklega eitt sterkast unglingamót í frjálsum íþróttum á Norðurlöndunum. Keppt er í flokkum 12 ára og eldri. Tobias Þórarinn Matharel náði bestum árangi UFA-keppenda, en hann jafnaði Íslandsmet í langstökki í flokki 15 ára og vann þá grein með stökki upp á 6,66 metra.
Tobias Þórarinn Matharel heldur áfram að gera það gott í frjálsum íþróttum. Hann vann langstökkið með jöfnun á Íslandsmeti á Gautaborgarleikunum nýverið.
Hópurinn frá UFA var líklega sá fjölmennasti til þessa, en félagið sendi út 28 keppendur ásamt því að 36 foreldrar og þjálfarar voru með í för. UFA reynir að fara hópferð á þetta mót annað hvert ár og nýtur ferðin vaxandi vinsælda sem fjölskylduferð í bland við keppnina sjálfa. Keppnisdagarnir eru þrír, en ferðin sjálf stóð í viku með verslunarferðum, heimsókn í skemmtigarð og fleiru. Keppt var á Slottskogvallen í Gautaborg.
Guðrún Hjartardóttir náði 6. sæti í hástökki.
Hér er stiklað á stóru yfir besta árangur keppenda úr röðum UFA
- Tobias Þórarinn Matharel jafnaði Íslandsmet Þorsteins Ingvarssonar úr HSÞ í 15 ára flokki með stökki upp á 6,66 metra í langstökki og vann þá grein. Hann náði 4. sæti í þrístökki, náði stökki upp á 12,66 metra og 5. sæti í 80 metra grindahlaupi á tímanum 11,12 sekúndur í flokki 15 ára.
- Róbert Mackay náði 4. sæti í 400 metra hlaupi í flokki 19 ára á tímanum 51,28 sekúndur.
- Pétur Friðrik Jónsson komst í úrslit í 100 metra hlaupi í flokki 17 ára á tímanum 11,40 og endaði í 12. sæti.
- Arnar Helgi Harðarson náði 6. sæti í 300 metra hlaupi í flokki 15 ára á tímanum 37,80 sekúndur.
- Guðrún Hanna Hjartardóttir náði 6. sæti í hástökki í flokki 15 ára og stökk 1,52 metra.
Keppendur, þjálfarar og aðstandendur frá UFA á Gautaborgarleikunum. Mynd: UFA.is.
Nánar er sagt frá ferðinni og mótinu í máli og myndum á vef UFA.
