Birna María til UFA og Egill verður áfram

Hlauparinn Birna María Másdóttir er gengin til liðs við Ungmennafélag Akureyrar. Þá er ljóst að Egill Örn Gunnarsson, sem bættist í hópinn fyrir síðasta sumar, verður áfram í herbúðum félagsins.

Bibba, eins og Birna María er gjarnan nefnd, „hefur skotist hratt upp á hlaupahimininn eftir mjög áhugavert hlaupasumar þar sem hún náði eftirtektarverðum árangri,“ segir í tilkynningu frá UFA.

Þrátt fyrir að hlaupaferillinn sé ekki langur barðist Birna María um efstu sætin bæði í Laugavegshlaupinu, þar sem hún endaði í níunda sæti, og 29 km hlaupinu í Súlur Vertical á Akureyri þar sem hún varð í öðru sæti. Þá varð hún í fimmta sæti í Mýrdalshlaupinu.

„Bibba, sem er þekkt fyrir að vera kraftmikill hlaupari, hefur verið að prufa sig áfram í styttri vegalengdum en hún var nálægt pallinum þegar hún endaði í fjórða sæti í 5 km Hleðsluhlaupinu í ágúst síðastliðnum á tímanum 18:53,“ segir í tilkynningu frá UFA.

Hún er búsett í Reykjavík og æfir undir handleiðslu Tobba og Evu hjá Fjallahlaupaþjálfun, hjónanna Þorbergs Inga Jónssonar og Evu Birgisdóttur, og segist spennt að spreyta sig í styttri hlaupum – hyggst prufa að keppa í millivegalengdarhlaupum fyrir UFA.

Egill Örn Gunnarsson varð í fimmta sæti í Laugaveginum í sumar og sigraði í 19m km hlaupi í Súlur Vertical. Þá varð hann þriðji í 42 km hlaupi í Istria í Króatíu á árinu. „Egill, sem er Akureyringur búsettur í höfuðborginni og æfir einnig undir handleiðslu þeirra Tobba og Evu hjá Fjallahlaupaþjálfun, segir að brautarhlaupin séu mjög spennandi og skemmtileg, sérstaklega yfir vetrartímann,“ segir í tilkynningunni frá UFA. Hann hefur stimplað sig inn sem einn helsti hlaupari landsins, segir þar. „Hans markmið á brautinni eru millivegalengdarhlaup sem og lengri brautarhlaup og halda áfram að keppast um efstu sætin í búningi UFA.“