Loksins! Viðgerðir eru hafnar á Hlíð

Viðamiklar viðgerðir eru hafnar á húsnæði hjúkrunarheimilisins Hlíðar við Austurbyggð á Akureyri. Lengi hefur verið vitað að hluti húsnæðisins var í mjög slæmu ásigkomulagi, meðal annars vegna myglu. Hluti húsnæðisins hefur verið lokaður síðustu mánuði vegna þess hve heilsuspillandi það var.

„Virkilega ánægjulegt og búið að taka „smá tíma“. Ég fullyrði að einbeittur vilji til góðra verka, sannfæringin að þetta myndi hafast, samstaða, þrautseigja og góða skapið ætíð hafi komið þessu til leiðar,“ skrifaði Teitur Guðmundsson, forstjóri Heilsuverndar, á Facebook í kvöld þar sem hann birti meðfylgjandi myndir. Heilsuvernd Hjúkrunarheimili  rekur Hlíð og Lögmannshlíð á Akureyri fyrir ríkið.

„Umfangsmestu framkvæmdir í viðhaldi og viðgerðum um árabil á Akureyri munu skila enn betra hjúkrunarheimili fyrir íbúa, aðstandendur og ekki síst starfsmenn. Slagorð Heilsuverndar „því hver dagur er dýrmætur“ á hér vel við. Til hamingju allir !“

Nánar um málið á Akureyri.net síðar.