Fara í efni
Fyrirtækið Heilsuvernd

Bærinn afsalar sér 85% eignarhluta í Hlíð

Haraldur Ingólfsson - haraldur@akureyri.net 16.08.2024 kl. 11:30
Tólf raðhús fyrir aldraða og bílastæðin þar suður af verða sér lóð í skipulagi í framhaldi af samkomulagi Akureyrarbæjar og ríkisins um viðhald og endurbætur á húsnæði hjúkrunarheimilisins Hlíðar. Mynd: Haraldur Ingólfsson.
Í tengslum við samning milli Akureyrarbæjar og ríkisvaldsins um fyrirkomulag á endurbótum við hjúkrunarheimilið Hlíð og kostnað við þær hefur verið ákveðin breyting á deiliskipulagi þar sem lóðinni að Austurbyggð 17 er skipt upp í tvær lóðir. Lóðin er í heild skráð 21.813 fermetrar, en breytingin felur í sér að afmörkuð er ný 6.275 fermetra lóð utan um núverandi raðhús og bílastæðin þar sunnan við.
 

Í umræddum samningi er kveðið á um að þinglýst kvöð verði sett á lóðina um að starfsemi á henni skuli vera vegna þjónustu í almannaþágu og jafnframt verði hjúkrunarheimilinu afmörkuð sérstök lóð, en 12 raðhúsaíbúðir fyrir aldraða fái sérstaka lóð. Íbúðirnar eru í eigu Akureyrarbæjar og eru ekki hluti af samningnum um endurbætur húsnæðis Hlíðar. 


Skipulagsuppdráttur sem sýnir skiptingu lóðarinnar Austurbyggð 17 í tvær lóðir. 

Samningurinn kveður jafnframt á um yfirtöku ríkisins á 85% eignarhlut í Austurbyggð 17 á móti 15% eignarhluta Akureyrarbæjar. Á grundvelli samkomulagsins mun ríkissjóður fjármagna viðhalds- og endurbótaframkvæmdir á hjúkrunarheimilinu Hlíð fyrir allt að 1.250 milljónir króna, sem uppreiknast miðað við vísitölu neysluverðs frá undirritun samkomulagsins.

Til baka í yfirlit