Sól, borgarferðir og fótbolti í beinu flugi

Nú þegar farið er að hausta leitar hugur margra út fyrir landsteinana og að þeim möguleikum sem í boði eru varðandi hvernig lengja megi í sumrinu og stytta veturinn. Akureyri.net kynnti sér framboðið næstu mánuðina á beinu flugi frá Akureyri.

Fast flug til London, Manchester og Zurich

Í vetur verður boðið upp á reglulegt millilandaflug til Manchester, London og Zurich.

Það er Easyjet sem flýgur til London og Manchester og verður flogið frá byrjun nóvember og út mars. Flogið er á þriðjudögum og laugardögum. 

Á tímabilinu 2. febrúar til 9. mars verður flogið á sunnudögum til og frá Zurich. Það er Verdi Travel sem selur miða í Zurich flugið. 

Þá býður Verdi Travel, sem og fleiri ferðaskrifstofur, upp á alls konar pakka í kringum Easyjet flugið. Aventura er t.d. að auglýsa dvöl í Brighton en 30 mínútna lestarferð er þangað frá Gatwick flugvelli. 

Þá er Verdi Travel t.d  með pakkaferðir fyrir knattspyrnuáhugafólk á Manchester United leik annars vegar og hins vegar á leik með Liverpool á Anfield Road.

Mögulega verður reglulegt flug í boði eftir áramótin til Amsterdam en samkvæmt upplýsingum frá Verdi Travel hefur það enn ekki verið staðfest.

Loks er þess að geta að Akureyri.net og Premierferðir/TA Sport bjóða í vetur upp á ferð í beinu flugi frá Akureyri á knattspyrnuleik með Liverpool á Anfield Road. Flogið verður með easyJet til Manchester. Smellið hér til að sjá nánari upplýsingar.

Fyrir utan áðurnefnd áætlunarflug eru ýmsar sérferðir í boði í vetur og hér fyrir neðan má sjá dæmi um þær:

• 13. september - Alicante   Alicante þarf vart að kynna fyrir Íslendingum en flogið verður beint þangað þann 13. september og heim aftur þann 20. september. Heimsferðir eru með þetta flug og bjóða gististaði í Calpe og Benidorm.
• 16. október - Skotland 5 daga fræðsluferð til Aberdeen með Tripical. 
• 17. október - Marokkó  Ferðaskrifstofan Tripical verður með fimm daga ferð til Marrakech. 
•  19. október - Tenerife Heimsferðir fljúga beint til Tenerife í október. Ferðin er 10 dagar en dagsetningarnar ættu að freista fjölskyldufólki því haustfrí er í öllum skólum á Akureyri, bæði grunn- og framhaldsskólum hluta af þessum tíma.
• 23. október - Skotland 5 daga fræðsluferð til Aberdeen með Tripical. 
• 25. október - Prag Ferðaskrifstofan Aventura býður upp á langa helgi í Prag. Farið út á fimmtudegi og komið heim á sunnudegi.  
• 1. nóvember - Tenerife 10 daga ferð verður í boði til hinnar ástsælu Tenerife í nóvember á vegum Verdi Travel. Hægt er að velja milli níu gististaða í bókunarvél ferðaskrifstofunnar en starfsfólk ferðaskrifstofunnar getur líka aðstoðað ef aðrir gististaðir eru á óskalistanum.
• 28. nóvember - Skotland Fjögurra daga aðventuferð til Aberdeen með Tripical. 
• 27. desember - Egyptaland  Ferðaskrifstofan Kompaníferðir býður upp á 9 daga ferð til Egyptalands í beinu flugi.  Dvalið verður í Hurgada, strandbæ við Rauðahafið. Þetta er í fyrsta sinn sem boðið er upp á beint flug til Egyptalands frá Akureyri.
• 24. apríl - Prag Í apríl er svo hægt að taka langa helgi í Prag með ferðaskrifstofunni Aventura. Farið er út á fimmtudeginum 24. apríl  og komið heim á sunnudegi. Sumardagurinn fyrsti er þann 24. apríl svo það gæti verið góð hugmynd að byrja sumarið í Prag.

• Ath: Þessi listi er ekki tæmandi og fleiri ferðir gætu bæst við eftir áramótin.