Seinkun á tunnuskiptum sunnan Glerár
Heimili í Gilja- og Síðuhverfi hafa nú fengið nýjar sorptunnur og verið er að klára tunnuskipti í Hlíðahverfi. Einhver bið verður á því að önnur hverfi í bænum fái nýjar tunnur því beðið er eftir því að fleiri tunnur komi til landsins.
Þetta staðfestir Ísak Már Jóhannesson, verkefnisstjóri úrgangs- og loftslagsmála hjá Akureyrarbæ. Í samtali við Akureyri.net fyrr í sumar talaði hann um að tunnuskiptum yrði lokið í september en nú er ljóst að vinnu við sorptunnuskiptin mun seinka og telur hann raunhæfara að tala um október og jafnvel að vinnan teygist fram í nóvember.
Ný gjaldskrá samþykkt
Þá hefur bæjarráð samþykkt gjaldskrá sorphirðugjalda fyrir árið 2025 en nú greiða fasteignaeigendur ekki fast gjald fyrir sorphirðu heldur eftir því hvers konar sorpílát þeir nota og hversu oft þau eru tæmd. Sjá gjaldskrána HÉR
Akureyrabær er ekki eina sveitarfélagið sem stendur í breytingum vegna sorphirðu. Akureyri.net hefur áður sagt frá því hvernig vinna við þennan málaflokk gengur hjá nágrannasveitarfélögunum.
