Topplið Þórs/KA heimsækir Þrótt í dag
Þór/KA sækir Þrótt Reykjavík heim í fimmtu umferð Bestu deildar kvenna, efstu deildar Íslandsmótsins í knattspyrnu í dag. Leikurinn fer fram á heimavelli Þróttar, AVIS vellinum í Laugardal.
Akureyrarliðið hefur farið vel af stað í deildinni og unnið þrjá leiki af fjórum en tapað einum. Liðið hefur unnið sterk lið eins og Breiðablik og Stjörnuna sem var fyrir mót spáð ofar en Þór/KA. Liði Þróttar var af mörgum einnig spáð ofar en Þór/KA í sumar svo það er áhugaverð viðureign fram undan.
Í seinustu umferð vann Þór/KA liðið 2:0 sigur á Breiðabliki í Boganum þar sem Sandra María Jessen og Hulda Ósk Jónsdóttir gerðu mörk liðsins. Sandra María er markahæst í deildinni með fjögur mörk. Lið Þróttar tapaði 3:0 gegn ÍBV í Vestmannaeyjum í síðustu umferð.
Úrslit Þórs/KA hingað til í deildinni:
- 1:0 sigur gegn Stjörnunni í Garðabæ
- 2:1 tap gegn Keflavík á Greifavellinum
- 1:0 sigur gegn ÍBV í Vestmannaeyjum
- 2:0 sigur gegn Breiðabliki í Boganum
Stöðuna í deildinni má sjá HÉR
Leikurinn hefst klukkan 18:00 og er sýndur á Stöð2Sport.
