Þór mætir Grindavík í úrslitakeppninni
Þór tapaði naumlega fyrir Val, 83:77, á heimavelli í kvöld í lokaumferð efstu deildar kvenna í körfubolta, Subway deildinni. Liðin voru jöfn að stigum fyrir leikinn í sjötta sæti (efsta sæti B-hluta deildarinnar) nú er ljóst að Þórsarar mæta Grindvíkingum í fyrstu umferð átta liða úrslitakeppni um Íslandsmeistaratitilinn.
- Skorið eftir leikhlutum: 15:20 – 17:23 – 32:43 – 19:22 –26:18 – 77:83
Valsmenn voru betri í fyrri hálfleik í kvöld og Þórsarar óvenju ragir. Munurinn var 11 stig að loknum fyrri hálfleik, Valsmenn náðu mest hátt í 20 stiga forskoti í þriðja leikhluta en Þórsstelpur bitu í skjaldarrendur eftir að þær hrukku í gang og þegar skammt var eftir munaði aðeins fjórum stigum. Sigur var í sjónmáli en herslumuninn vantaði.
Maddie Sutton skoraði mest í Þórsliðinu – 24 stig. Hún tók að auki 17 fráköst og átti fjórar stoðsendingar. Lore Devos gerði 22 stig, tók 9 fráköst og gaf 7 stoðendingar.
Smellið hér til að sjá alla tölfræðina
Niðurröðun liðanna í 8-liða úrslitum úrslitakeppninnar um Íslandsmeistaratitilinn verður svona:
- Keflavík (1. sæti) - Fjölnir (8)
- Grindavík (2) - Þór Akureyri (7)
- Njarðvík (3) - Valur (6)
- Haukar (4) - Stjarnan (5)
Úrslitakeppnin hefst 8. apríl og vinna þarf þrjá leiki til þess að komast í undanúrslit.
Ljóst er að við ramman reip verður að draga í átta liða úrslitunum en Þórsstelpurnar komu skemmtilega á óvart í undanúrslitum bikarkeppninnar á dögunum og sigruðu Grindvíkinga; sýndu þar að allt er mögulegt í íþróttum.
