Bæjarstjórnarfundur í Hrísey á 20 ára afmæli

Þann 1. ágúst síðastliðin áttu Akureyri og Hrísey 20 ára afmæli staðfestrar sambúðar. Sameining Hríseyjar og Akureyrarkaupstaðar var samþykkt í júní 2004 og tók formlega gildi 1. ágúst sama ár.

Í tilefni af tvítugsafmæli sambúðarinnar verður bæjarstjórnarfundur haldinn í Hrísey þriðjudaginn 29. október. Þetta kemur fram í fundaáætlun sem samþykkt var á bæjarstjórnarfundi fyrr í mánuðinum og fagnar hverfisráð Hríseyjar því að bæjarstjórn ætli að funda í eynni í tilefni af afmælinu.