Zonta – 40 ára afmæli og listaverkauppboð
Zontaklúbburinn Þórunn hyrna er 40 ára um þessar mundir og af því tilefni verður afmælishóf og listaverkauppboð í Deiglunni í Listagilinu á laugardaginn, 5. október kl. 15:00. Zontakonur vonast til þess að sem flestir komi og fagni með þeim.
Í hófinu heiðrar klúbburinn Helenu Eyjólfsdóttur, einn stofnfélaga Þórunnar hyrnu, stiklað verður á stóru í sögu klúbbsins og haldið verður listaverkauppboðið LIST STYÐUR LIST, undir stjórn Villa vandræðaskálds. Boðið verður upp á tónlistaratriði og léttar veitingar.
Deiglan verður opnuð kl 14.00 með forsýningu á listaverkunum, en dagskrá hefst kl. 15.00.
Hugmyndin að uppboðinu var listaverkagjöf til klúbbsins, að því er segir í tilkynningu. „Allur ágóði af uppboðinu rennur í sjóð til að styðja konur til listnáms og/eða listsköpunar. Verkefnið og styrktarsjóðurinn fékk nafnið LIST STYÐUR LIST.“
Listaverkin eru til sýnis á facebook og instagram, þar sem áhugasamir geta boðið í verkin.
Hér er Facebook síðan þar sem listaverkin eru til sýnis er: Listaverkauppboð Zontaklúbbsins Þórunnar hyrnu
Nú í október mánuði verður auglýst eftir umsóknum um styrki og fer úthlutun fram í tengslum við 16 daga átak Sameinuðu þjóðanna gegn kynbundnu ofbeldi sem stendur frá 25. nóvember til 10. desember n.k.
_ _ _
ZONTA
Í tilkynningu frá Þórunni hyrnu segir:
Zontahreyfingin vinnur að því að bæta stöðu og lífsgæði kvenna hvar sem er í heiminum, bæði á eigin vegum og í samstarfi við stofnanir Sameinuðu þjóðanna og frjáls félagasamtök. Zonta leggur sérstaka áherslu á valdeflingu ungra stúlkna og kvenna m.a. með því að styðja þær til náms og veita þeim þannig brautargengi til aukinna tækifæra og áhrifa í samfélaginu.
Zontaklúbbar vinna að þessum markmiðum með því að safna fjármunum sem renna bæði til verkefna innanlands og utan. Dæmi um innlend styrktarverkefni Zontaklúbbsins Þórunnar hyrnu eru: Aflið/Samtök gegn kynferðis- og heimilisofbeldi, Bjarmahlíð/miðstöð fyrir þolendur ofbeldis, Kvennaathvarfið, Rauði krossinn og Velferðarsjóður Eyjafjarðar. Ennfremur hefur klúbburinn styrkt einstæðar mæður til sumardvalar með börnum sínum.