Kristín Sóley vill sniðganga Eurovision
Kristín Sóley Björnsdóttir, viðburðastjóri Menningarfélags Akureyrar, sem í gær var kjörin í stjórn Ríkisútvarpsins ohf., vill að stofnunin sniðgangi Söngvakeppni evrópskra sjónvarpsstöðva ef Ísrael fær að taka þátt. Þetta kemur fram í umfjöllun mbl.is um nýkjörna stjórn stofnunarinnar.
Stjórn Ríkisútvarpsins ohf. var kjörin af Alþingi í gær og þar eiga Akureyringar tvo fulltrúa, einn í aðalstjórn og einn varamann. Kristín Sóley Björnsdóttir kemur ný inn í stjórnina sem aðalmaður og á meðal varamanna er Albertína Friðbjörg Elíasdóttir, framkvæmdastjóri Sambands sveitarfélaga á Norðurlandi eystra og fyrrum þingkona Norðausturkjördæmis. Báðar eru fulltrúar meirihlutans á Alþingi í stjórninni.
Fréttavefur Morgunblaðsins birti í gærkvöld yfirlit um afstöðu flestra þeirra sem sitja í hinni nýju stjórn til þátttöku Íslands í söngvakeppninni með það í huga hvort Ísrael fær að taka þátt eða ekki. Í umfjölluninni kemur hins vegar fram að óvíst sé hvort ný stjórn geti tekið þá ákvörðun að sniðganga keppnina í ár, úr því sem komið er.
Kristín Sóley er afdráttarlaus í sinni afstöðu til þátttöku Ríkisútvarpsins í keppninni. Í umfjöllun mbl.is er haft eftir henni: „Ég vil að við sniðgöngum keppnina ef Ísrael verður ekki vísað úr henni,“ en segir það jafnframt ömurlega leiðinlegt þar sem nú þegar sé búið að velja verðuga fulltrúa Íslands. Þorgerður Katrín Gunnarsdóttir utanríkisráðherra hefur sagt það skrýtið og óeðlilegt að Ísrael fái að vera með í keppninni.
Áhorfendur mega veifa fána Palestínu
Í framhaldi af efasemdum sem fram hafa komið hjá fulltrúum sjónvarpsstöðva sem taka þátt í keppninni, meðal annars frá Íslandi, Slóvakíu og Spáni, sendi Samband evrópsrka sjónvarpsstöðva, EBU, frá sér yfirlýsingu þar sem tekin eru af öll tvímæli um þátttöku Ísraels í keppninni.