Daníel staðartónskáld WindWorks í Norðri

Tónlistarhátíðin WindWorks í Norðri, sem helguð er blásturshljóðfærum, verður haldin 2. til 12. ágúst næstkomandi og fara tónleikarnir fram á söfnum víðsvegar um Norðurland.

Hátíðin, sem fyrst var haldin í fyrra, er sú eina hérlendis þar sem blásturshljóðfæri eru í forgrunni, að því er segir í tilkynningu.

Meðal markmiða hátíðarinnar er að stuðla að nýsköpun í tónlist með því að panta og frumflytja verk íslenskra tónskálda og fyrsta staðartónskáld WindWorks í Norðri er Daníel Þorsteinsson. „Hann hefur skipað sér sess og verið kraftmikið afl í íslensku tónlistarlífi síðustu áratugi. Ný verk Daníels flétta hátíðina í ár saman þar sem ýmsir flytjendur munu spreyta sig á tónlist hans,“ segir í tilkynningu.

Staðartónskáld hefur ekki áður verið ráðið að tónlistarhátíð úti á landi, nema við Sumartónleika í Skálholti, „og þykir okkur tími til kominn að hvetja norðlensk tónskáld til dáða.“

Tónleikar hátíðarinnar verða á eftirtöldum stöðum:

• Pálshús á Ólafsfirði
• Safnahúsið á Húsavík
• Flugsafn Íslands á Akureyri
• Listasafnið á Akureyri
• Menningarhúsið Berg á Dalvík
• Sauðaneshúsið á Langanesi
• Safnasafnið á Svalbarðsströnd

Fyrstu tónleikarnir verða í Pálshúsi á Ólafsfirði miðvikudaginn 2. ágúst. Þar frumflytja Petrea Óskarsdóttir flautuleikari og Ella Vala Ármannsdóttir hornleikari verk eftir Daníel Þorsteinsson.

Nánar verður fjallað um tónlistarhátíðina síðar á Akureyri.net