Blak og fótbolti á dagskrá í dymbilviku

Dymbilvikan einkennist annars vegar af úrslitaeinvígjum í blaki og inngangi að fótboltasumrinu. Bæði lið KA í blakinu eru búin að ná forystu með sigrum í fyrsta leik á heimavelli. Knattspyrnuliðin þrjú eiga líka öll leiki í vikunni þegar keppni í Bestu deild kvenna hefst og bæði karlaliðin spila í 32ja liða úrslitum Mjólkurbikarsins.

MIÐVIKUDAGUR - fótbolti og blak

Þór/KA hefur leik í Bestu deildinni á morgun, miðvikudag, þegar liðið sækir Víkinga heim á Víkingsvöllinn í fyrstu umferðinni. Þór/KA fór í úrslitaleik Lengjubikarsins í lok mars og endaði í 2. sæti í Kjarnafæðimótinu eftir slæmt tap fyrir FHL í lokaleik mótsins síðastliðinn föstudag.

Leikmannahópurinn er lítið breyttur frá því í fyrra, en þó aðeins. Þrír erlendir leikmenn sem voru hjá Þór/KA í fyrra, Shelby Money, Lara Ivanusa og Lidija Kulis, eru allar farnar annað og Ísfold Marý Sigtryggsdóttir gekk til liðs við Víking í vetur. Inn í hópinn eru komnar Eva Rut Ásþórsdóttir frá Fylki og markvörðurinn Jessica Berlin, auk þess sem inn í hópinn koma ungar heimaaldar stelpur.

• Besta deild kvenna í knattspyrnu
  Víkingsvöllur kl. 18
  Víkingur - Þór/KA

Þór/KA og Víkingur mættust í lokaumferðinni í efri hluta Bestu deildarinnar í fyrrahaust. Víkingur vann leikinn og skaust upp í 3. sætið, upp fyrir Þór/KA sem endaði í 4. sætinu. Leikir liðsins í deildinni í fyrra sumar unnust báðir á útivelli. Þór/KA vann 2-1 á Víkingsvellinum, en Víkingar unnu 2-0 á Akureyri, auk sigursins í lokaleiknum.

- - -

Nágrannar berjast um Íslandsmeistaratitilinn í blaki kvenna. Deildarmeistarar KA á í höggi við Völsung sem endaði í 2. sæti deildarinnar. KA vann öruggan 3-0 sigur á Völsungi í fyrsta leik einvígis liðanna um Íslandsmeistaratitilinn og komið að öðrum leik á Húsavík á miðvikudagskvöldið. 

• Úrslitaeinvígi Unbroken-deildar kvenna í blaki
  PCC-höllin á Húsavík kl. 19:30
  Völsungur - KA

Vinna þarf þrjá leiki til að hampa Íslandsmeistarabikarnum. Þriðji leikur liðanna fer fram í KA-heimilinu þriðjudaginn 22. apríl. 

FIMMTUDAGUR - blak

Karlalið KA í blaki fór vel af stað í úrslitaeinvíginu, eins og konurnar. Það er að vísu ekki nágrannaslagur því mótherjarnir eru Þróttarar úr Reykjavík. KA vann fyrstu viðureign einvígisins 3-0 í KA-heimilinu á sunnudag og sækir nú Þróttara heim í Laugardalshöllina á fimmtudaginn. 

• Úrslitaeinvígi Unbroken-deildar karla í blaki
  Laugardalshöll kl. 14
  Þróttur R. - KA
  

Þriðji leikur liðanna fer fram í KA-heimilinu miðvikudaginn 23. apríl, síðasta vetrardag.

FÖSTUDAGUR - fótbolti

Liðin í Bestu deild karla eru að hefja þátttöku í Mjólkurbikarkeppninni, koma inn í 32ja liða úrslitin. KA fékk heimaleik og fær heimsókn að austan á föstudaginn langa þegar lið KFA kemur í heimsókn á Greifavöllinn. KFA leikur í 2. deild og vann Spyrni 3-0 í 2. umferð keppninnar.

• Mjólkurbikar karla í knattspyrnu, 32ja liða úrslit
  Greifavöllurinn kl. 17:30
  KA - KFA

LAUGARDAGUR - fótbolti

Þórsarar hófu leik í 2. umferð Mjólkurbikarkeppninnar þegar þeir tóku á móti Magna í Boganum og unnu öruggan 7-0 sigur. Þórsarar fengu heimaleik eins og nágrannarnir og fá lið ÍR í heimsókn í Bogann á laugardag. ÍR leikur í Lengjudeildinni eins og Þór.

• Mjólkurbikar karla í knattspyrnu, 32ja liða úrslit
  Boginn kl. 15:00
  Þór - ÍR