Um silakeppi og vini glóperunnar

Sigurður Ingi Friðleifsson, sviðsstjóri loftslagsmála, orkuskipta og nýsköpunar hjá Orkustofnun, brennur fyrir hraðari innleiðingu á nýjum lausnum sem geta hjálpað til við að takast á við loftsslagvána, bætt orkunýtni og aukið orkuöryggi. Hann er nýjasti gesturinn í hlaðvarpinu Transformia – Sjálfefling og samfélagsábyrgð, þar sem hann spjallar við Auði H. Ingólfsdóttur, m.a. um rafbíla, silakeppi og vini glóperunnar.

Sigurður segir innleiðingarhlutann oft vera týnda hlekkinn í breytingakeðjunni þegar kemur að því að færa sig yfir í umhverfisvænni tækni. Jafnvel þó að nýjar, hagkvæmar lausnir séu komnar fram á sjónarviðið þá sé ekki hægt að treysta á að innleiðing eigi sér stað sjálfkrafa. „Það þarf að brúa bilið frá lausninni til notkunar” segir hann.

Sigurður er Reykvíkingur en hefur búið í Eyjafirði í rúm tuttugu ár, auk búsetu erlendis. Hann telur synd hvað flæði Íslendinga um landið sé lítið því það geti verið mikið ævintýri að flytja út á land, hvort sem er tímabundið eða til lengri búsetu, og slíkt auki víðsýni. Hann er líffræðingur í grunninn, kennaramenntaður og fór í framhaldsnám til Svíþjóðar þar sem orkumálin voru í forgrunni. Í starfi sínu hjá Orkustofnun leggur hann áherslu á fræðslu, frekar en prédikun, og telur mikilvægt að fólk hafi aðgengi að upplýsingum sem hjálpi því að meta valkosti sjálft.

Framtíðarsýnin fyrir Ísland er hringrásarhagkerfi sem notar eingöngu endurnýjanlega orku í hógværu neysluumhverfi, að mati Auðar. Sigurður telur óumflýjanlegt að breytingar verði gerðar í þá átt en það skipti miklu máli hversu hratt þær eigi sér stað. Þekkingin sé til staðar, sem og hagkvæmar tæknilausnir, en íhaldssemi og ótti við breytingar koma í veg fyrir að þær séu eins hraðar og æskilegt væri.

Smellið hér til að hlusta á spjall Sigurðar og Auðar.